21st Century-a R&B/Hip-Hop hla lar ber ‘Blinding Lights’

Billboard chuan Top Hot R&B/Hip-Hop Songs of the 21st Century-ah The Weeknd hla hit ‘Blinding Lights’ an thlang. Billboard hian kum 2000 atanga 2024 tawp thlenga kartin a Hot R&B/Hip-Hop Songs chart-a an lan dan atanga tehna ki hrang hranga an teh hnuah ‘Blinding Lights’ hi tun kum zabi thara R&B/Hip-Hop hla lar berah an thlang ta niin an tarlang.
Blinding Lights hla hi chart top 10-ah kar 59 chhung a lang thei a, tun kum zabi thara he chart top 10-a lang rei thei ber a la ni a, tun kum 25 chhung chauh pawh ni lovin 1958 atanga Hot R&B/Hip-Hop Songs chart an siam atanga chart top 10-a lang rei thei ber a la ni, kar 59 top 10-a a lan chhung hian kar 11 chu No.1 a ni nghe nghe a, The Weeknd hla he chart-a No.1 kai thei hla 9 zinga No.1 ni rei ber a ni bawk.
November 2021 khan ‘Blinding Lights’ hi Billboard Greatest of All Time Hot 100 Songs chart-ah No.1 a lo ni tawh bawk a, hemi tum hian The Weeknd chuan, “Sawi vak ngaihna pawh ka hre lo. Malsawmna ka dawng a ni ber mai, ka lawm hle a ni tawp mai,” tiin genre hrang hrang lakkhawm pawha hla lar bera thlan a nih chungchang hi a lo sawi tawh bawk a ni.
R&B Hip-Hop Songs 21st Century Chart Top 10:
1. The Weeknd, “Blinding Lights”
2. Lil Nas X & Jack Harlow, “Industry Baby”
3. Mary J. Blige, “Be Without You”
4. Miguel, “Sure Thing”
5. Macklemore & Ryan Lewis feat. Wanz, “Thrift Shop”
6. Bruno Mars, “That’s What I Like”
7. Post Malone & Swae Lee, “Sunflower (Spider-Man: Into the Spider-Verse)”
8. SZA, “Snooze”
9. Maxwell, “Pretty Wings”
10. Robin Thicke feat. T.I. + Pharrell, “Blurred Lines”