NLUP tha mi kan duang mek – MPCC treasurer
Congress party chuan an sawrkar leh huna hman tur ‘NLUP tha mi’ an duang mek a, tlangzarh hma erawh an phal lo niin an party hruaitu Dr Lalmalsawma chuan a sawi.
August 27-30 chhung khan MPCC treasurer Dr Lalmalsawma Nghaka hian Mamit district khaw thenkhat Marpara- Silsury- West Phaileng tlangdung khua tlawhin an party dinhmun a enfiah a. Congress party chu Zoram dam lehna tur policy nen a sawrkar leh dawn tih sawiin, an policy duan mek chu ZPM research leh MNF party policy nen khaikhin chi a ni loa, kum engemawzat an zir tawh a ni tih a sawi. Tunhma pawhin NLUP chu mithiamten ngun takin an zirchiang a, Mizoram bakah Delhi tlang thlenga mithiamte rawn thin a ni tih a sawi a ni.
“Tunah hian kan ram mil zawng leh kan zawh tawkin ‘Zoram Dam Lehna Policy’ kan duang mek. NLUP changtlung zawk, ‘NLUP thami’ ti tea sawi a ni bawk. Kan hotuten an rawn her rem zel ang. Congress party hian kan tih hlawhtlin theih ngei tur policy kan rawn chhawp chhuak dawn a ni,” a ti.
ZPM chu research nen policy duang angin an inzuar a, vawiina an dinhmun kan hria tih MPCC hruaitu hian a sawi. “Thlai thar lei kawnga an talbuai nasat zia pawh kan hria a, an policy hi a fail a, keini’n policy kan tlangzarh nghal mai chuan min entawn ang tih a hlauhawm hial. Keini chuan kan tihhlawhtlin theih ngei kan rawn nei anga, ram leh hnam damna policy kan nei dawn. Mizoramah hian Congress party chauh hi mahni intiamna policy tihlawhtling thiam a, tihlawhtling thin party a ni,” a ti.
Congress party chu hlawkna atana politics khel an ni loa, Zoram dam lehna atan, mipui nawlpui dinhmun tha zawka hlankaina tur politics-a zuang lut an ni tih a sawi. Sum leh pai lam a ni loa, ramin hma a sawnna atana theihtawp chhuah ve mek an ni tih a sawi bawk. “Sum leh therhlo hmanga inthlem lungawi hi a hun tawh lo, kan ram siamtha a, kan ram tlu chhe mek tungding leh tura thawk tlang turin Congress party chuan mipui kan sawm a ni,” a ti.
ZPM sawrkarin Forest Conservation (Amendment) Act 2023 a thlawp ta mai chu central BJP atanga nawrna a nasat em vang a ni em tih an zawt tih Dr Lalmalsawma hian a sawi bawk.