Tuilakna tur lehzela eirukna hi…

Tun hnaia Assembly Session neih zawh taka CAG Report 2025 (Phek 329-a chhah) pharh takah khan, Mizoram sawrkar department hrang hrang hnuaia hnathawh dan dik lo leh, cheng vaibelchhe tam tak hu sum kal kual vel dan dik lo thahnem tak tarlan a ni a. Chung zinga mihring nunna nena inhne hnai deuh bik pawimawh tak pakhat chu tuilakna tura eirukna hi a ni.
Tui hi nunna nei tawh phawt tan nunna hnar a ni a; a bikin mihringte hi, thil nung zingah chuan, tui tel lova dam rei thei lo ber kan ni hial awm e. Tui pawimawhna chu inhrilh hranpa kan ngai lo, tu te pawhin kan hriat chian em em a ni.
Environment kan suasam nasat avangin Mizoram sik leh sa a danglam chak hle a. Chumiin a hrin chhuah chu, tuna harsatna lian tak kan tawh mekna tui harsatna hi a ni. Tui hna a kiam a, lui tui a kâm a, tui haichhuah tumin lei chhungril thuk tak tak kan verh bawk. Chutiang khawpa tui lama harsatna kan tawh mek lai chuan, thenkhat chuan tuilakna tur hna (project) an lo suasam mek ve thung a; heng mite hi mipui hrawk rek chunga mahni inhaivur duh an ni tiin a sawi theih ang.
Tuna CAG report-a tuilakna tihchingpen dan kan hmuhte hi Kolasib district chhung Watson Division pakhat huam chhunga thil thleng a ni mai a, district dangah pawh hetiang thil hi thleng thei a ni. CAG report hian kum hnih kaltaa thil thleng tunah a rawn pholang a ni a, CAG hian pholang lo ta se, sawrkar hian a hre dawn lo tihna a ni mai awm e. Hetiang thil thleng langsar tak pawh hre lova sawrkar a awm thei hi a mak hle a. Hei hian system a fel lohzia a pholang nghal a tih theih bawk ang.
CAG report-in a tarlan pakhat, Saihapui ‘K’ Solar Pumping Water Supply Scheme hnuaia, tui litre nuai khat dawng tur tuizem (RCC reservoir) siam hna, a chanve pawh la zawh loh, langsar taka hmuh theih chu thawk zo tawh anga sawiin tuizem siamna senso tur cheng nuai 14.71 contractor pek a ni a. June ni 2, 2022-a thawh, July 12, 2022-a thawh zawh (completed) tia Measurement Book-a record thlap a ni.
CAG report hi Assembly House-ah pharh a ni a, sawrkar chuan a hmu ve vek ta a, eng tin nge hma a lak zui zel tih hi mipuiin kan lo thlir dawn a ni.