GST Council-in chhiah lak zat bi thar pawm, vantlang mamawh tam zawk a tlawm dawn

GST Council-in chhiah lak zat bi thar pawm, vantlang mamawh tam zawk a tlawm dawn
GST Council thukhawm chuan Nilaini khan India-a indirect tax lak zat bi nasa taka sawi danglamin 5 leh 18% inkar chawi turin a siam rem a, September 22-a hman tan a nih hunah chuan thil tam tak a tlawm phah thei dawn.
In chhungkhuar mamawh atanga lei tihthatna, pheikhawm, thawmhnaw leh hman nawn theih thil tam tak pawh chhiah tlem zawk lak a ni dawn a. A hmaa chhiah 12% leh 28% lak thin tam tak pawh tihhniam a nih duai avangin thil tam tak a tlawm dawn.
Bawnghnute tha, ultra-high temperature (UHT) milk chu a hmaa 5% chhiah chawi thinah a ngai tawh danw lo va, condensed milk, butter, ghee, paneer eh cheese pawh 12% atangin 5%-ah tihhniam niin thenkhatah phei chuan chhiah lak a ni dawn lo.
Malt, starch, pasta, cornflake, biscuit, chocolate leh cocoa atanga siam chhuahte pawh a hmaa 12-18% chhiah lak thin chu 5% chauh lak a ni tawh dawn.
Almond, pistachio, hazelnut, cashew leh hetiang chite atanga chhiah 12% lak thin pawh 5% chauh lak a ni tawh ang.
Refined sugar, sugar syrup leh chhang siamna atana hman chi toffee leh chithlumte chu 5% chauh lak a ni tawh dawn.
Tel (vegetable oil), ransa thau, edible spread, sausage, sa siam sa, sangha lam chi leh malt atanga siam ei tur fun sa zawng zawng pawh chhiah 5% chauh lak a ni tawh ang.
Namkeen, bhujia, mixture, chabena leh hetiang ei tur ang chi, tui in tur siamchawp ang chi zawng zawng, chini leh thlum tel loh ang chi chu chhiah 18% lak atangin 5% chauh lak a ni tawh dawn.
Lei tihthatna hmanrua pawh a hmaa 12/18% lak thin chu 5% lak a ni dawn a. Thlai chi, thlai atanga siam thil thenkhatte pawh 12% atangin 5% chauh lak a ni tawh ang.
Nunna chhanna atana hman damdawi, hriselna lam kaihhnawih thil siam chhuah leh damdawi hmanrua (device) pawh 12/18% lak thin atangin 5% lak a ni tawh dawn a, thenkhat phei chu chhiah lak miah lohna a awm bawk ang.
Vantlangin in tina an hman, electrical appliance thenkhat chu 28% atangin 18%-ah tihhniam a ni a. Pheikhawk leh puanthan pawh 12% atangin 5% chauh lak tawh tura tih a ni.
GST lak zat bi tihtharin thil tam tak a tihtlawm dawn laiin thil thenkhat erawh a to reng dawn a. Pan masala, gutkha, sikret, chewing tobacco, zarda, vaihlo sawngbawl lo leh bidi te chu GST sang tak lak zel a la ni dawn.
Aerated tui telna ang chi te, chini leh a tihtuina dang telna ang chi ei leh in tur chu 28% chhiah lak thin atangin 40% lak tawh tur a ni a.
Nawmchenna thil ang chi, sikret, zu tha leh car man tote pawh chhiah lakah tihhniam ve a ni lo.
Chhiah lak zat bi thar tuka GST Council thutkhawm kaihruaitu, Union Finance Minister Nirmala Sitharaman-i chuan chhiah lak zat bi thar chu mawlmang taka siam ngawt a ni lo va, nakin zel nghawng thei tura ruahman a ni tih a sawi a. Council-in thutlukna a siamah chuan zau taka inrawn a ni a, minister zawng zawng pawhin an pawmpui tih a sawi.
“Prime Minister (Narendra) Modi-a chuan GST hniam hi a hma thei ang berah mipuiin hmang se a duh a. Mawlmang taka thiul tih a ni lo va, thil indawt dan siam remna a ni a, a dik lo kha kan siam tha a ni,” tiin Sitharaman-i chuan a sawi.
Thil tam taka chhiah lak tlem hian khawsak a tiawlsam dawn a, sumdawng tenau dawm kangin India-in Aatmanirbhar Bharat hnuaia mahni kea din a tumna a tichak dawn niin finance minister chuan a sawi a. “Khawsak vantlangte hman thinah a vaiin tihhniam a ni,” a ti.
Prime Minister Modi-a pawhin X-ah GST lak hniam ta chu lawmawm a tih thu a tar lang a, “Independence Day-a thu ka sawiah khan GST-ah hian chhuan thar chhiah siam thar ka sawi a. Sorkar laipui pawh kimchang taka inbuatsaihin vantlangin an hlawkpuia economy tichak thei tura duan a ni a. Zau taka insiam tharna hian khua leh tuite khawsak tiawlsamin sumdawng, a bikin a tenauten an hlawkpui dawn a ni,” a ti.