Yamuna-in Delhi-a a chim san ber pathumna thleng, tui a lian tan

Yamuna lui chuan Delhi-a a chim san ber pathumna tawngin metre 207.41-a sang a chim tawh a, lui kam tawn tawnah luang liamin chenna in leh sumdawnna hmunte pawh a chim tan tawh.
Yamuna hian tun tuma a chim chin aia sang hi kum 1978 leh 2023-ah chauh khan a la chim a ni.
Yamuna Bazar, Geeta Colony, Majnu Ka Tila, Kashmiri Gate, Garhi Mandu leh Mayur Vihar vengah chuan tui a lian mek a, heng hmun hi sumdawnna leh chenna hmun awm kawpna vek a ni.
Thuneitute chuan mi 14,000 chuang hmun himah an insaseng tawh tih sawiin chhanchhuah hna thawh mek zel a ni tih an sawi a. ITO, Mayur Vihar leh Geeta Colony-ah relief camp siam a ni tih an sawi bawk.
Outer Ring Road-ah chuan lirthei kal vel pawh a buai phah a, ITO atanga Ring Road kalna chu tuiin a chim vek avangin lirthei tan a kal theih tawh lo va. Vasudev Ghat, Monastery Market leh Old Delhi Railway Bridge pawh khar a ni.
Yamuna lui lian hian Delhi-a ruang hal ralna upa ber leh lun ber, Nigambodh Ghat a chim hmasa ber a, tui chim chin a san zel avangin Nilaini chawhnu atang khan mi vui leh ruang hal pawh chawlhsan rih a ni.
“Tunah hian khar vek chu a la ni chiah lo va; mahse, tui chim chin hi a sang zel si a, khar hun pawh a la awm ang,” tiin municipal officer-in news agency PTI a hrilh.
Red Fort hnung, Ring Road hrula awm, Nigambodh Ghat-ah hian ruang halna hmun 42 a awm a, Delhi-a a upa ber leh miin an pan nasat ber a ni.
“Ruang hal zat a tlem hle a, invui erawh kalpui zel a la ni a. Tui hian ruang halna tura mei chhehna a la thleng lo deuh va, a san zel erawh chuan kan tawp ngei a ngai dawn a ni,” tiin a enkawltu chuan a sawi.
Yamuna-a tui a tam chhan hi Wazirabad leh Hathnikund tuikhuah atanga darkar tin tui sah vang a ni a. Central Flood Control Room officer chuan an dinhmun thlirin tui hi sah a la ngai dawn a, tui chim chin hi a san belh zel a rinawm hle tih a sawi.
Thuneitute chuan North, North East, Shahdara, East, Central leh South East district-te chu khawpui bera tui a len mai hlauhthawnawm lai a nih thu an sawi.
Kum 2023 khan khawpui hi tui lianin nasa takin a tibuai a, hemi tum hian Yamuna hian metre 208.66-a sang a chim a. Kum 1978 khan metre 207.49 a lo thleng tawh bawk a. Kum 2010-ah metre 207.11 leh kum 2013-ah metre 207.32 a lo chim thleng tawh bawk.
Khawpuia Irrigation & Flood Control Department chuan Uttar Pradesh state sorkar nen indawrin Okhla tuikhuah atanga tui sah dan tur an ruahman a. Okhla atanga tui sah tam hi ram khawpui bera tuite rang taka a luan chhuahna tha ber a ni.
Tual chhung rorel khawl chuan public health department hnenah tui lenna hmun leh relief camp-ah thosi atanga piang thei natna a darh loh nan insecticide uluk taka kap turin an hriattir.