Mizoram taekwondo team kutah silver pakhat leh bronze medal 2

Mizoram taekwondo team kutah silver pakhat leh bronze medal 2
August ni 28 atanga September ni 2, 2025 chhunga Cuttack, Odisha-a khelh zawh tak 4th National Sub- Junior & Senior National Taekwondo Championship (Kyorugi & Poomsae)-ah Mizoram team chuan silver medal pakhat leh bronze medal pahnih an sualchhuak.
Mizoram tana medal latu Vanlalmawipuii, Mamit chuan sub-junior under 32kg huangah sliver medal a awrh a; Bhupesh Sungh Rawat chuan senior category under 87kg huangah bronze medal a la bawk.
Senior team freestyle-ah Mizoram tan a hmasaber ni turin Vanlalmawipuia, Lalrinchhana, Lalinpuia, Ramdingliani leh Doris Lalhmangaihzualite’n bronze medal an dawng bawk a ni.
Vanlalmawipuii hi round of 32-ah a bye phawt a; round of 16-ah Tamil Nadu player chu 13-2,10-8-a hnehin, quarter-final bout-ah Chandigarh aiawh chu 8-4,12,7-in a hneh leh.
Semi-final stage-ah Mizo naupang hian Delhi player chu 13-6,12,10-in a paltlang a; final-ah thenawm Assam aiawh chu 2-14,9-10-in a ngam ta lo hlauh a ni.
Under 87kg senior huanga Mizoram tana bronze medal hlawhchhuaktu Sungh Rawat chuan round of 32-ah 6-2, 8-3-in Chhattisgarh lam mi a hneh phawt a, round of 16 bout-ah Uttar Pradesh player chu 8-6, 12-9-in a hneh leh.
Quarter-final lamah Karnataka aiawh chu 10-9, 6-2-in a hneh a; semi-final stage-ah erawh 4-9, 2-8-in SSCB player lakah a tlawm.