Pawl leh party-ten FCAA 2023 a ngai ngaia hman an duh lo
Pawl leh party-ten FCAA 2023
a ngai ngaia hman an duh lo
Tlawmngai pawl, environment humhalhtu pawl leh political party thenkhat chuan Forest Conservation Amendment Act 2023 chu a ngai ngaia pawm (adopt) an duh loa, sut leh a nih theihnan Special Assembly Session ko turin Mizoram sawrkar an ngen.
Joint Civil Society of Mizoram (JCM) chuan 2025 August 27-a Mizoram Legislative Assembly thukhawmin Forest Conservation Amendment Act 2023 (FCAA 2023) a nih ang anga Mizorama hman tura a pawm (adopt) chu tha an ti loa, pawmpui theih ni loa an hriat avangin, hemi chungchanga inrawnkhawmna hi Inrinni khan a buatsaih a. NGO, political party leh pawl hrang hrang an sawm zingah – Central YMA, MHIP Gen. Hqrs, MPCC, MNF, AAP, PC, Mizoram Transformation Movement (MTM), CESJ, Mizoram First, CATAJ, ZORO, Mizoram Environment NGO 12 an tel tih an sawi.
Inrawnkhawmnaah hian Mizoram Legislative Assembly-in FCAA 2023 a pawm tak chu kan ram leh hnam, kan thlahte leh chhuan lokal zel turte tana thil him lo, tha lo leh pawi tak, chhiat hlenna hial thlen thei nia an hriat thu an sawi.
FCAA 2023 hi a nih ang anga pawm tha an ti lo a, Mizoram Legislative Assembly Session thukhawmin a pawm (adopt) chu sut leh ni se, a tul angin Assembly Special Session pawh ko ngei nise, an ti.
Legislative Assembly thukhawmin FCAA 2023-a lo pawm tawh chu sut a nih leh theihna turin hmalakna tur hrang hrang an duang lawk a. A hmasa ber atan September 11 khian Aizawl Vana Pa Hall kawtah FCAA 2023 a ngai ngaia pawm an duh lohna lantir nise, an ti a. A tul danin kawng zawh leh bandh huaihawt bakah online leh off-line signature campaign neih, Mizo mipui hrilhfiaha Mizoram khaw hrang hranga vantlang inkhawm neih, tih a tel. Heng thutlukna hi a hlawhtlin ngei theihnan JCM hmalakna an thlawp tih sawi a ni bawk.
Hetihlai hian Inrinnia Dampa biala kal Forest, Environment & CC minister Lalthansanga chuan, FCAA 2023 chungchangah lehlam pawlten politics-a inbeihna hmanruaah hmangin nasa takin sawrkar an bei tih a sawi.
“He dan hi kan ram tana thil tangkai zawk leh ram leilungfate tana malsawmna thlentu zawk a ni. Hun hmasa lamah kha chuan hmasawnna hna thawh a nih dawnin forest clearance lamah harsatna eng eng emaw a awm thin a, tunah chuan heng harsatna hi sutkian a ni tawh dawn a ni,” a ti.