Mizo hming hawha motor workshop siamtute endik

Mizo hming hawha motor
workshop siamtute endik
Mizo hming hawha hnamdangin automobile workshop siamtu hnamdangte chu tlawhchhuah an ni a, hming an hawhsakte chu hnamdang kuta an workshop dah tawh lo turin an hriattir.
Mizoram Automobile Workshop Owners Association (MAWOA) Gen. Hqrs. chuan Bawngkawn West huamchhunga motor workshop siam hnamdang an awm tih report an dawn bawhzuiin an enfiah a. Workshop pahnihah kalin, an hming hawhtirtu Mizote chu workshop an siam duh a nih chuan anmahni ngeiin enkawl a, hnamdang kutah an workshop dah tawh lo turin an hriattir.
Mizoramah hnamdangin motor workshop siam an remti lo tih MAWOA hian sawiin, Mizo mipui pawh Mizo hming hawhtira hnamdang kuta workshop siamtir an remti lo tih an sawi. Mizo hming hawha workshop siamte pawh zawnchhuah zel an tum tih an sawi a. Mizo mipuiin hnam chhan rilru pua an hming hawhtira hnamdang tana kawng hawnsak lo turin an ngen tih a sawi a ni.