CM-in Catholic kohhran rawngbawlna fak

CM-in Catholic kohhran rawngbawlna fak
Northeast Catholic Community of Delhi (NECCOD) New Delhi-in an hnuaia zirna ina zirlai lut tharte lo lawmna hun Pathiannia an buatsaih chu chief minister Lalduhoma’n a hmanpui a. Education minister Dr Vanlalthlana leh Lok Sabha MP Richard Vanlalhmangaiha ten an tawiawm.
Chief minister chuan Catholic kohhran chu India rama zirna, hriselna leh mi chhumchhiate chhawmdawlna lama langsar taka rawngbawl thin an ni a. Mizoramah pawh rawngbawlna ropui tak tak an kalpui nasa hle tih a sawi. Zoram Entu Pawl chu tanpui ngaite tanpuitu kan neih langsar niin, Aizawla sawrkar high school ni loa high school hmasa ber St. Paul’s High School dintu pawh Catholic kohhran niin, kum 1953-ah an din a. Vawiin thlenga Mizorama high school tha bera ngaih ni thei khawpin an kalpui tih a sawi.
“Zirna in tha tak tak dang pawh tam tak in nei a. He kohhran mi leh sa, ram hruaitu langsar tak tak, Mizoram chief ,inister hmasa ber Pu Ch. Chhunga, Assam Public Service Commission chairman Pu R. Thanhlira, Assam sawrkara Mizo minister hmasa ber Pu A. Thanglura, Pu FC Nghina, Pu J Lalsangzuala leh midang tam tak kan lo nei tawh thin. St. Anthony College Shillong te chu NE India-a college lar hmasa a ni,” a ti.
Zirlaite chu an nu leh paten ram leh khawtlang tana eng an lo chhit tawh chu an chhunzawm zel a tul tih Lalduhoma hian sawiin, Catholic kohhran rawngbawlna zar zotu kan tam tawh em em a, vawiin thlengin kan ramin an rawngbawlna a la chhawr zel tih a sawi a ni.
Catholic kohhran mi leh sa, Delhi-a khawsate huikhawmtu tha tak NECCOD an nei chu tha a tih thu sawiin, kum 30 chuang tangkai takin rawng an bawl tawh a, kohhran leh ram tan chauh ni loin hmarchhak mipui inunauna atan pawh NECCOD hian a thawhhlawk hle tih a sawi.
Fresher social hi Agnes Fanai chuan a kaihhruai a, Ministry of Finance joint secretary Lucas L Kamsuan chu khualzahawm niin, NECCOD president BK Angam pawhin thu a sawi a ni. NECCOD-ah hian member 2000 vel an awm mek.