Naupang inkhawmpui hmang

Naupang inkhawmpui hmang
September 14 (Pathianni) kha Mizoram Presbyterian Kohhran Naupang Sunday School Inkhawmpui Ni a ni a, Pastorl bial hrang hrangah Naupang Inkhawmpui hi hman a ni.
Naupang Inkhawmpuiah hian Pathian thu, hla leh thu inchhang hmangin inel a ni a. Hei bakah hian naupangten item hrang hrang a remchan dan angin an nei bawk. Naupang Inkhawmpui hi bial tam zawk chuan intihsiakna atan an hmang a, bial thenkhat chuan intihsiak loin, a kal that dana mark pekin an hmang a ni.
Naupang Inkhawmpui hi a tirah chuan missionary-te thahnemngaihna avanga neih tan a ni a. Kum 1931 khan Aizawl Tlangnuam Kohhranah neih a ni a, hei hi Naupang Inkhawmpui hmasa ber nia hriat a ni. Tunhma lam chuan bial hrang hrangin an remchan hunah an nei mai thin a, tunhnai atang khan bial tin an kalrual theihnan Mizoram Sunday School Union chuan Sunday School Zirlai syllabus-ah Naupang leh Senior Inkhawmpui hun tur an ruahman tel ve a. September Pathianni vawi hnihnaah Beginner department atanga Sacrament department leh, Pathianni vawi thumnaah Senior department inkhawmpui an nei thin a ni.