Leimin leh kawng chhia vangin Naupang Inkhawmpui hmang lo

Leimin leh kawng chhia vangin
Naupang Inkhawmpui hmang lo
Leimin leh kawngchhia avangin Champhai district-a Zokhawthar Presbyterian Kohhran Pastor bial leh Khawbung Vengpui Pastor bial chuan Mizoram hmun dang rualin September 14 – Pathianni khan Naupang Sunday School inkhawmpui an hmang thei lo.
Thudawn danin, Zokhawthar panna kawngpui World Bank Road leh tunhma lama kawngpui hlui, Melbuk kaltlanga Champhai atanga Zokhawthar panna kawng chu hmun thenkhatah leiminin a hnawh avang leh kawng hnawh hi thenfai hman a nih loh avangin Zokhawthar Presbyterian Kohhran Pastor bial Naupang Sunday School Inkhawmpui chu Mizoram hmun dang rualin an nei thei ta loa, hun remchang dangah Naupang Inkhawmpui hi neih turin sawn hlat a ni. Zokhawthar Presbyterian Kohhran Pastor bialah hian kohhran pasarih – Zokhawthar, Melbuk, Hruaikawn, New Hruaikawan, Zokhawthar Vengthar, Bulfekzawl leh Zokhawthar Vengthlang an awm a ni.
Champhai district tho Khawbung Vengpui Pastor bial pawhin kawng chhia avangin Naupang Sunday School inkhawmpui hi an hmang thei loa, he bialah hian kohhran pathum – Khawbung Vengpui, Dungtlang leh Samthang Kohhran an awm a ni.