Super Cup winners tan lawmman a \ha dawn!

Tunhnai khan All India Football Association (AIFF) chuan thuchhuah siamin, season-opening Super Cup football tournament champion team chuan 2026-27 season-a AFC Champions League 2 play-off an khelh tur thu an puang.
FC Goa chuan Super Cup 2024-25 champion nih manah tun season-ah hian Asia khawmualpui huap club competition inkhaidiat dana a pahnihna (second tier) ACL 2 play-offs khelin, group stage an thleng a; Super Cup 2024 edition champion East Bengal FC chuan heti ang hun hi an nang hman ta lo chiah chiah a ni!
Odisha FC tih loh Indian Super League club zawng zawngin Indian football league season bultanna Super Cup football tournament hi khelh vek an tum thu an tichiang tawh niin national federation thuchhuah chuan a tarlang a, thla thara khelh tan tura ruahman a ni.
Kan hriat thin ang khan, kuminah Indian football top flight league-in harsatna lian tak a tawk a, ISL buatsaihtu FSDL leh ISL kalpui phalna petu AIFF-te’n kum 15 zet an lo thawhdun tawhna kumin December thlaa tawp tur tuaithara contract ziak thar turin harsatna an tawk a, ISL season thar pawh an tan thei lo mai ang tih hlauhna a piang hman a, Odisha FC telin ISL club thenkhat phei chuan an player leh mi chhawr dangte hlawh an pe chhunzawm ta lo hial a; mahse, December thla hian ISL season thar chu tan theih beisei a ni a, season hawnna tournament Super Cup khelh hun tur pawh an tichiang thei ta a ni.
Hun dangah chuan Super Cup hi season tawpa khelh thin niin, kuminah chuan season tan hmain an khel dawn ta a ni.
AIFF thuchhuah chuan, “Odisha FC tih loh ISL club 12-te chuan kumin Super Cup khelh an remti a, an tel dawn leh dawn loh zawtin kan han confirm leh ang a, chu mi hnuah tournament chungchanga thutlukna tak tak chu siam a ni ang,” tiin.
16-team tournament khelh turah hian ISL club-te bakah I-League lam atangin a tlem berah team pathum beisei an ni a, ISL team inhnukdawk an awm palh chuan I-League club hi an la pung leh mai thei.
Ruahmanna hmasa ang chuan kumin Super Cup hi October ni 25 atanga November ni 22 chhunga khelh tur a ni a, hei hi December thla atanga khelh tan theih tura beisei ISL season thar atana inbuatsaihna tha tak a ni ngei ang.
AIFF hian club-te tan Super Cup khelh chakawmna thar a sihhmuh a, champion team chuan 2026-27 season-ah hian AFC Champions League 2 play-off hmun an chang dawn a ni.
Paltlang tur pakhat la awm erawh champion team chuan Indian Club Licensing Regulations hnuai atangin Premier 1 License an neih phawt a ngai ang.
AIFF thuchhuah chuan ACL 2 play-off lama inlan Indian club chu a tlang zo lo a nih chuan automatic-a AFC Challenge League (ACGL) group stage an khelh ui tur thu an puang tel nghal a, ACGL hi Asia khawmualpui huap club competition inkhaidiat dana a pathumna (third tier) niin, ACL 2 hnuai chiaha mi a ni.