Operation Sindoor-ah JeM chief Azhar-a chhungkua phin darh

Khawvel huapa firfiak pawl hlauhawm ni phak, Jaish-e-Mohammad-a an hotupa ber, Masood Azhar-a chhungkua chu India-in Operation Sindoor a kalpuia a beihnaah khan an phin darh vek niin an pawl commander-in a sawi.
JeM commander Masood Ilyas Kashmiri-a hian May 7-a thlawhna hmanga India-in an hmunhma a beih chungchang a sawina chu social media-a a video a darh nasa hle.
“He ramri him nan Delhi, Kabul leh Kandahar kan bei nasa a. Kan engkim kan hlan hnuah May 7 khan Maulana Masood Azhar-a chhungkua chu Indian sipaiten Bahawalpur-ah an phin darh vek a ni,” tiin Kashmiri hian inkhawmna hmun pakhatah Urdu-in a sawi a ni.
India hian Operation Sindoor tia hming vuahin May 7 khaw var hma khan Pakistan leh Pakistan-occupied Kashmir (PoK)-a mi firfiakte tanhmun leh an awm khawmnate chu thlawhna hmangin a kap a ni.
Indian sipaiten he beihpui an thlak hi April 22-a mi firfiakten Jammu & Kashmir-a khualzinte tlawh tam hmun, Pahalgam-a mi beia mi 26 an thah phuba an lakna kha a ni.
Sipaite hian Bahawalpur, Kotli leh Muridke-a JeM bakah Lashkar-e-Taiba (LeT) leh Hizbul Mujahideen firfiak pawlte tawmna hmun a kap a ni.
Hemi tum hian Azhar-a chhungte zinga 10 leh a lamhnai tak tak pali an thi a. A nuphal, kum 1999-a Indian Airlines flight IC-814 hruai kawinaa mawhphurtu lian tak ni bawk, Mohammad Yusuf Azhar-a pawh a thi.
India hian beihpui a thlakah hian mi firfiakte tawmna hmun chauh a bitum a, Pakistani sipaite thil leh anmahni engmah khawih chhiat a nei lo nia hriat a ni a. Hetih lai hian Pakistan chuan a chhang letin drone leh missile hmangin India a bei a, ram pahnih hi ni li chhung indo zuiin May 10-ah inkahhai an puang ta a ni.
Inkahhai hi Pakistani Director General of Military Operations (DGMO)-in May 10-a Indian sipai hotu lawk biaa indona tihtawp a rawt angin India leh Pakistan chuan an puang ta a ni.