German journalist-in Kane lakah thupha a chawi!

German journalist-in Kane lakah thupha a chawi!
Tottenham Hotspur tan game 435-a goal 280 thun tling Harry Kane chu kum 2023 nipui thawt lai khan Bundesliga giants Bayern Munich chuan pound maktaduai 95 tehrengin an senglut a; London atanga Bavaria lama a insawn tirh khan German media-te chuan England record goal-scorer laka chuti zat zat sum sen kha an sawisel a, mahse, tunah chuan an ngaihdan an thlak ta a, £100m dawn phu loa an lo ngaihnaah khan thupha an chawi!
Inrinni TSG Hoffenheim muala Bayern Munich-in 4-1 hnehna an channa game-a a hat-trick siam leh nen Englishman Kane hian Bavarians tan match 103 lekah goal 98 zet khung tling tawhin, assist pawh tum 29 a siamchhuak tawh a, England-a a awm lai ai mah khan Kane hi lehlam pawl goal bulah a chimawm tawh zawkin an hria!
Kane leina mana Munich sum phawrh sawiseltute zinga pakhat BILD mi leh sa Alfred Draxler chuan Inrinnia England forward hat-trick siam lai a thlirliam leh meuh kha chuan thupha chawi lo thei loah a inngai ta a ni chek ang a, German champion-in sum hlawm an phawrh a sawisel tawh chungchangah Kane hriat turin ngaihdam a dil ta hial mai!
Season thara Bundesliga game li lek a la khelh atangin he forward hian goal riat zet a khung tling leh der tawh a, German journalist-te an inchhir ta pawh hi a mawh lo e!
England No 9 hian PreZero Arena khelmuala mipui 30,150 pungkhawm hmaah home supporter rual pungkhawm pawi vawi thum a sawi a, chu’ng zinga a hmasaber leh sikhat faia mikhual team hmahruaina ni nghal chu chawlhlawk hnaih minute 44-a tihluh niin, second half tir te leh a laihawlah penalty atang ve vein goal hnih dang a thawh belh leh a, karliamta Nilaini Champions League-a Chelsea laka goal hnih a lo thun tawh nen tun ni li chhung mai khan Kane hian Bundesliga club tan goal nga a khung tling a, German chanchinbumite tan ngaihdam dil mai loh chu kawng dang a awm lo ve bawk a ni!
Hun tawp hma minute riat lek awm tawhah West Ham full-back hlui Vladimir Coufal chuan a club vawn lai tana a goal hmasaber ni ta kha free-kick khak fuhin Bayern goalkeeper Manuel Neuer-a ven goal-ah thun ve nawlh bawk mah se Czech goal avanga Bayern goal phai hi hun pekbelh tawp dawnah Serge Gnabry chuan a chhungkhat zui ve leh.
He goal luh dan hi hetiang a ni. Home keeper Oliver Baumann chuan Joshua Kimmich-a goal tur dansak mah se ball perlet chu Gnabry hian goal-ah chantirin, kha kha team pahnih inkhela ball chhuih tawpna a ni zui nghal.
Tun season-a Bundesliga game a khelh apianga goal thun chho zat zat ex-Liverpool winger Luis Diaz chuan goal a khung zo ta lo tlat thung a, hun tawp dawnah goal kham erawh a fuh leh hram!
He game-ah hian Chelsea atanga loan-a Bayern zawm phawt Nicolas Jackson chuan a vawi khatna atan luhhmasak chang ve bawk mah se minute 62-a an lakchhuah hma zawng khan Senegal striker hi khelmualah a reuh riau!
Reh ve lo Harry Kane chuan tun season league-a Bayern Munich chak kal tluang lai a pui tha leh hle a; game lia vawi li chaka point 12 nena Bundesliga hma an hruai theihna kawngah a thawhhlawk.
German club zinga Lammuala rawn inkhel tawh awmchhun Hoffenheim laka a goal hnihna kha Albian Hajdari handball hrinchhuah penalty atanga a thun niin, video assistant referee (VAR) check hnua substitute Michael Olise hlawhchhuah penalty atangin minute 77-ah a goal thumna a chhuihlut leh a, kum 32 mi ni tawh chungin Bundesliga hat-trick vawi kua a siam tling ta hial a ni!
England captain hian tun season inelna hrang hrang belhkhawm match sarih atangin goal 13 tehreng a thun tling ta a, inkhelh banah pawh a uang ve hle a, amah kawmtu DAZN hnenah, “Sikul kan kal lai pawhin ‘hat-trick Harry’ tih chu min koh dan a ni ve reng reng a, ka la naupan viau lai pawha ka chin than pangngai kha ani ve tlat,” a ti!
Sawi belhin, box chhunga ball awm chu penalty a ni emaw ni lo emaw target fuh tura thawnluh chu a hna a nih thu a sawi lang tel!
Chuti ang mi chu German media-te pawhin an zah lo thei ta lo a, a chunga tarlan tak German journalist pakhat Draxler an tih khian social media kaltlangin Kane chungchanga ngaihdan dik lo zet an lo put hman chungchangah thupha a chawi zui ta a ni.
A ziah dan chuan: “Kum 2023-a Tottenham atanga Bayern Munich-a euro 100m transfer sawiseltute zinga mi kha ka ni a; khatih lai khan kum 30 mi ni tawh, eng title mah la sualchhuak ve ngai eih lo manah chuan khati zat sum sen kha tam mah mahin ka ngai a; man tlawm zawk sengluh tur an awm ringtute zingah telin, entirna’n, a hma chiah seas-n-a Werder Bremen tana goal 16 khung tling Niclas Fullkrug-te kha lak zawk awm takah kan ngai lo thei lo a ni.
“Kane hi inhliam ve ngai lo a lo ni reng a, chu chu vanneih vang a ni ngawt thei lo. Inhliam lo tur chuan mahni invawn fimkhur leh inthunun that a ngai a, training chhah tak eng lai pawha zawm reng a ngai tlat bawk,” tiin Englishman laka ngaihdan dik lo an lo put hman chungchangah thupha a chawi.
2026-27 season tawpa a contract hmang zo ve tawh tur Kane hian Bayern Munich-ah kum hnih hun a la nei a; a kum lo tam ve zel mah se Bundesliga champion hian an inremna ding lai tawp ruala kum 34 tling tawh tur England international hi inremna thar an ziahpui dawn em tih an ngaihtuah mek!
Bayern hian striker thar Nicolas Jackson chu Chelsea atangin loan-in tun nipui insuan hun lai khan an senglut ta phawt a, an mit a tlung chho a nih chuan nakkum nipui thawt hunah hian a nghetin an kawl chhunzawm thei dawn.
German journalist leh author ni bawk Raphael Honigstein chuan Jackson hi Kane thlaktu ni thei turah a ruat a, Premier League lama Spurs hero hlui kirlehna hmahruai ni turah a ngai!
Goal 213 thuna Premier League all-time leading goalscorer zinga pahnihna dinhmun luah mek Kane-a chungchang sawiin talkSPORT hnenah Honigstein chuan, “Germany mipuite chuan Bayern thuam inbel chunga Harry Kane-a’n a career a zial fel hi an beisei lo a, chu chu zep theih pawh a ni lo.
“Ka rin dan chuan kum 2027 thleng awh tur contract a hman zawh hmain Bayern a chhuahsan hmel a; he mi chungchang hi amah leh club pawhin fair taka an thlirho ran pawh a ngaih hmel,” tiin Bundsliga champion leh England captain inkara a hmuh dan a sawichhuak.
Kane hi England-ah kirin Premier League all-time top scorer ni mek Alan Shearer-a record lehpelh a tum dawn a nih chuan top flight goal 48 lai thun belh a la ngai dawn a, chuti tur em chuan Munich-a a contract neih lai zawh hun nghah chu remchang lutuk dawnin a lang lo a, tuna hat-trik a la siam pap pap theih lai hian kir vat se a tifuh mai thei!