Chak loh ngai thei lo Real Madrid!

Chak loh ngai thei lo Real Madrid!
Inrinni zanah sihnih faia an mikhual Espanyol hneh lehin Spanish La Liga season thara match nga an khelh tawhah Real Madrid an la chak fai vek a, point 15 neiin an hmahruaina an sawhnghet deuh deuh.
Santiago Bernabeu stadium-a inkhel entu mipui 73,466 zet hmaah Brazilian defender Eder Militao chuan minute 22 an khelh tlin rualin mualneitu team hmahruaina goal a khung a; an goal hnihna hi second half tan hnu lawka Kylian Mbappe thun ve thung niin, tun season league-ah Fr ance captain hian Real tan goal ruk a khawl tling leh der tawh!
Vinicius Jr. siamsak atanga a goal thun leh nen Frenchman Mbappe khan season kal lai inelna hrang hrangah belhkhawmin Real tan goal sarih a khung tling ta hial mai.
Result atang ringawt chuan Spanish giants hi nuamsa pangngai taka chak niawm tak an nih laiin Espanyol lam khan awlsam lutuka tlawm an tum bik awzawng lo a, Bernabeu club style kan hmuh thin anga game dak mar tluang zuih ang kha hmuhtir an tum lo nasa a, si hnih ngawt chhuah tho bawk mah se hun tam tak Real attacking hlauhawm tur an chawkdai thei.
Hun rei tak a dar na sawi ve reng thin England midfielder Jude Bellingham-a na benvawn pawh kumin July thla khan zaisak a ni ve ta nge nge a, a chawlh vang vang hnuah Inrinni zan khan Real Madrid tan hun tawp dawn minute 89-ah khelmual a lut ve leh thei ta hram a, kha kha kumin Club World Cup hnu lama inelna a hmachhawn leh vawi khatna chiah a ni.
Espanyol kha Real ang deuh bawka season bul tan fuh tak ni mah se season kal laia a vawi khatna atan an tlawm ve ta nge nge a; league khelh ngaah vawi thum chakin, draw vawi khat an nei bawk.