GST rate tihhniamin mipuia nghawng a neih dan inanglo

September 22 atanga sawrkar laipuiin bungrua leh service tam zawka Goods & Services Tax (GST) rate a tihhniam chuan mipuia nghawng a neih dan a inang lo hle a. A bikin thil man to lei pha lo chi chuan an hrethiam thui tawk lo hle nia hriat a ni.
The Aizawl Post-in a zawhkualnaah GST rate tihhniam hi sumdawng lian, a bikin dealer/agent ho chuan an ngaihvenin anmahni dawrtute pawhin an ngaihven a, lirthei a ni emaw bungraw man tam deuh a ni emaw an lei tum dan pawhin nghawng a nei a. Book lawk ngai chi ah chuan September 22 hnulama lei tuma book lawk an tam viau niin an sawi. Hetihlai hian nitin mamawh zuar, a hlawma pechhuak ho leh anmahni hnen atanga lachhawngtu dawr lian ho chuan GST rate hniam hi an ngaihven viau bawk nia sawi a ni.
Hetihlai hian, mipui nawlpui, GST rate a hniam avanga bungrua leh service lei tur tam zawk chuan a ngaihven dan an thiam tawk lo em tih ngaihdan awm thei khawpin sawizui tur hre tam lo an awm nual tih The Aizawl Post-in mi a biakpawh ho atangin a lang a. Taxation department hotute leh dealer/agent ho chuan mipui chu GST rate thar hnuaia thil man tih tlawm dan zirchiangin, wholesale-a petuten a man tlawm ang hian an pe em tih chik thei se tha an tih thu an sawi a ni.
Taxation department hotute chuan bungraw tam zawkah GST rate tih hniam a nih avang hian sumdawngte pawhin GST rate hniam ang zat zelin bungraw man an tihniam nghal tur a ni tih an sawi a. Chutianga ti lo te chu GST dan hnuaia anti-profiteering measure hmangin hrem theih a ni a. Mipuiin rate hniam tura ngaih, hniam loa zuar/ hralh an hriat chuan phone no: 0389 – 2336167, mobile: 8415065109, 9862581640 ah hriattir theih an ni tih an sawi.