Ecuador lung ina mi sual pawl intihbuainaah mi 14 thi
Ecuador lung ina mi sual pawl intihbuainaah mi 14 thi
Ecuador lung ina tang mi sual pawl intihbuaina chhuakah mi tang 13 leh anmahni vengtu pakhat a thi a, mi dang 14-in hliam an tuar bawk niin police-in an sawi.
Chhimthlang lama Machala khawpuia lung in bula chengte chuan Thawhtanni hma taka buaina chhuakah khan thil puak ri leh silai ri pawh an hriat thu an sawi hlawm.
Police chief William Calle-a chuan tang tlan chhuak pawh an awm thu a sawi a, an zat chiah erawh a sawi lo va, mi 13 an man leh tawh thu a sawi.
Ecuador-ah hian lung ina tangte intihbuaina leh helna chawh chhuah hi a thleng fo va, tang zinga mi sual pawl hrang awmte inkarah buaina a chhuak zing hle.
Thawhtannia buaina chhuak hi mi sual pawl, Los Lobos Box tia hming invuahte chawh chhuah niin police chuan an sawi a, an pawl erawh chuan engmah an la sawi lo.
Chhuina hmasaah chuan vengtuten tan in hung chhunga tang awm khawmna hlawm lian pakhat atanga alarm-a kohna an dawn bawhzuiin an kal a. An va thlen chuan mi tangte hian lo hrengin an zinga pakhat an that zui a ni tih tar lan a ni.
Vengtute an hren hnuah hian Los Lobos Box member-te hian awm khawmna in chu luhchilhin an inkharhnan a, an elpui pawl dang mi an bei ta nia sawi a ni.
Puak thei eng emaw tihpuahin tan in hungna bang a tihkuakah mi tang thenkhat an tlan chhuak zui bawk.
Engtin nge lung in chhungah puak thei an ken luh theih tih erawh hriat mai theih a la ni lo.
Hliam tuar mi 14 zinga pahnih chu police officer an nih thu Cdr Calle-a chuan a sawi a. Police leh sipai 200 chah luh an nih hnuah tan in hi vengtuten an thunun zui leh thei tih a sawi bawk.
Ecuadorean TV station Ecuavisa chuan Machala-a chengte hian an khawpui laili laia awm lung in hi sawn turin tun hma atangin an lo ngen tawh niin a puang.
Ecuador-ah hian mi sual pawlte tharum thawhna a thleng nasa hle a, tun hmaa Latin America-a ram him ber ni thin kha tunah chuan thihna thlen tam berna zinga mi a ni tawh.
Lung ina tang mi sualte hian pawn lamah mite thununin Mexican drug cartel (ruihhlo tawlhtu pawl) nen inthlun zawmin an thenawm ram atanga cocaine phurh luhte chu Ecuador-a lawngchawlh hmun kaltlangin US leh hmun dang danga tawlhnaah an inhnamhnawih thin.
Thla tiurah khan US chuan Ecuadorean gang pahnih – Los Lobos leh Los Choneros chu Foreign Terrorist Organization (FTO)-ah a puang nghe nghe.