Central scheme hmangin street vendor loan leh in sak tanpuina dil duh tan hawng
Central scheme hmangin street vendor loan leh in sak tanpuina dil duh tan hawng
Urban Development & Poverty Alleviation department buatsaih Angikaar Campaign ‘PM Awas Mela Shehri’ leh ‘Lok Kalyan Mela’ chu Mizoram district hrang hrangah neih a ni a. Aizawlah pawh UD&PA secretary Lalmalsawma Pachuau hoa neih a ni.
UD&PA secretary chuan mipui tana duan sawrkar scheme hrang hrang hnuaia hamthatna awm chu mipui tam zawkin an dawn theihnan sawrkarin hma a la a, chak zawka thawh zel an inhuam tih a sawi. Hamthatna dawngtute chu ram hmasawnna atana sawrkar progress partner an ni, tiin, tanpuina sum leh loan an dawn chu a hmanna tur dik taka an hman a pawimawh thu leh, mipui tamzawkin hamthatna an dawn theihnan bank ho nen tha taka an thawhho a pawimawh thu a sawi a ni.
Lok Kalyan Mela campaign hi PM SVANidhi hnuaia street-vendor-te dinhmun chawikanna tura sawrkar hmalakna a ni a. He campaign-in a tum ber chu – PM-SVANidhi scheme hnuaia loan dil thar duhte tana hun siamsak; he scheme hnuaia loan lo dil tawh, la pek lohte hnena loan pek chhuah; loan dilna lut tawh, bank lamin an dilna a thawn let lehte ennawn; loan la tawh, digital payment la hmang lote hmantir tura puih; food safety lama thawktute nena tanghoin street food vendor-ten eitur thianghlim zawka an siam theihna tura zirtirna pek; loan lo la tawh leh an chhungkaw member-te social economic profiling tiha, welfare scheme hrang hrang an chhawr tangkai theihna tura hma lak, tihte a ni.
Mizoramah PMSVANidhi scheme hnuaiah hian street vendor mi 2586 hnenah loan vawikhatna Rs. 10000 theuh pek tawh niin, mi 751 hnenah loan vawihnihna Rs. 20000 theuh pek an ni tawh a, mi 123 hnenah loan vawi thumna Rs. 50000 theuh pek tawh niin, loan pek chhuah tawh zawng zawng hi cheng vaibelchhe 4.98 a tling tawh. PM-SVANidhi scheme tharah hian loan vawikhatna Rs.10000 ni thin kha Rs. 15000 a tih pun a ni a, loan vawi hnihna Rs.20000 ni thin kha Rs. 25000 a tih pun a ni. A vawi thumna erawh a ngai anga kalpui tur a ni a, loan latu street vendor-te hnenah credit card pek an ni ang.
Angikaar campaign ‘PM Awas Mela – Shehri’ hi PMAY-Urban hnuaia in sak tanpuina chungchang mipui tam zawkin an hmelhriatna tura sawrkar hmalakna a ni a. He campaign-in a tum chu, PMAY-U hnuaia tanpuina dawngtuten PM Surya Ghar :Muft Bijli Yojana (Rooftop Solar Subsidy Scheme) leh PM SVANidhi an hmelhriat a, chumi hmanga hamthatna an dawn theihte inhriattir a ni. Angikaar campaign chhung hian in sak tanpuina dawng tawhten an in sak laia harsatna an tawhte an thlen theihna turin ‘help desk’ siam a ni.
PMAY-U hi Mizoram pumah Census Towns 23 ah kalpui a ni a, beneficiaries 36789 awmin mi 23813-in in an sa zo tawh a, la sa zo lo chuan kumin October ralhma ngeia sa zo tawh tura tih an ni a, in an sak stage tinah UD&PA directorate-ah in report tur an ni.
PMA –Urban 2.0 hi Ministry of Housing & Urban Affairs chuan 2024 September 17 khan PMAY-U (phase 1) chhunzawmna atan a duang leh a. PMAY–U 2.0 hnuaia in sak tanpuina hi online unified web portal hmangin dilna thehluh tur a ni.