Anganwadi worker-te hriat tur tul hrilh
Anganwadi worker-te hriat tur tul hrilh
Rashtriya Poshan Maah (National Nutrition Month) 2025 hmanna kalzelah Women & Child Development district programme officer leh Aizawl Urban ICDS Project child development project officer buatsaihin Aizawlah Anganwadi worker (AWW) te tan nausen leh naupang chaw pek danan an hriat tur tul inzirtir a ni.
Women & Child Development asst. director i/c DPO Lalrammawii Kawilam chuan National Nutrition Month hi rampumah a a vawi 8-na atana hman a ni mek tih a sawi a. October 16 thlengin kawng hrang hrangin nu leh nausen hriselna kawnga chaw tha ei pawimawhna leh naupang enkawlna kawnga thil pawimawh inzirtir a ni dawn tih a sawi.
Govt. Zirtiri Residential Science College-a associate professor Lalrammawii’n Infant and Young Child Feeding (IYCF) chungchang a zirtir a. Nu leh nau pawmten nausen hnute pek dan dik an hriat a pawimawh thu leh nausen hriselna atan thianghlimna a pawimawh zia a sawiin, tunlaia naupangte eitur kan pek tam tak chu an hriselna atana tha lo a ni tih a sawi.
Occupational therapist C Lalnuntluangi chuan naupangte thanlenna kawnga harsatna hrang hrang awm theiah zirtirna pein, nu leh paten fate mobile phone an entir nasa lutuk chu naupang tan a tha lo thei a, hemi kawngah hian nu leh pate fimkhur a pawimawh tih a sawi a ni.
Mizoram University Department of Clinical Psychology faculty Dr Lalnunpuii chuan puitlingte ang bawkin naupangah pawh rilru lama harsatna tam tak a thleng thei a. Chutiang hrethiam thei tur chuan Anganwadi workers leh nu leh pate pawh inchhiarzau a, inzir nasat a pawimawh tih a sawi a ni.
Rashtriya Poshan Maah hi India ram pumah kum 2018 atang khan kumtin, thla khat chhung – nu, naupaite leh naupangten eitur tha leh hrisel an ei a pawimawh zia inzirtirna atan hman thin a ni a. Kuminah hian September 17 khan hman tan niin, October 16 thleng a awh dawn a ni.