Tamil Nadu-a innek buainaah mi 39 thi, TVK lakah thubuai siam

Tamil Nadu-a innek buainaah mi 39 thi, TVK lakah thubuai siam
India-a police-te chuan Inrinni zana politics thila intawhkhawmnaa hmuna mipui innek buaina thlenga mi 39 thihnaah Tamil lemchang thiam, politics-a inhmang zui ta, Vijay-a kaihhruai political party lakah thubuai an siam tih Pathianni khan an sawi.
Chhim lam, Tamil Nadu-a thi zingah hian naupang pawh an tel a, mi 50 chuang inhlan an awm a. Vijay-a hian a kaihrhuai, Tamilaga Vettri Kazhagam (TVK) party tan nakuma an state inthlan campaign-in intawh khawm hi a huaihawt a ni.
Tamil Nadu police chuan thubuai an ziak lut a, ‘TVK party hruaitu – Bussy Anand, Nirmal Kumar leh VP Mathiyalagan te lakah thubuai siam a ni a, chhui zui mek a ni’ tih police hotu, V. Selvaraj-a chuan Reuters a hrilh.
“TVK hian a tirah mi 10,000 punkhawm phalna an dil a; mahse, a tak takah chuan a let fe an pung khawm a ni,” a ti.
Tamil cinema-a kum 30 chhung lo tal tawh leh hausa ber pawl, Vijay-a hian nikuma party a din atang khan bawrtu a ngah hle a. Kurur district-a thil thleng hi ‘pawi a tiin a rilru a na tak zet’ tih a sawi a, a tuartu chhungte puih a tum thu a sawi bawk.
Tamil Nadu Chief Minister MK Stalin-a chuan a tuartu chhung tinte hnenah Rs. nuai 10 theuh pek an nih tur thu a puang tawh bawk.
State sorkar hian chhiatna thlen chhan chhuitu tur committee din tawhin judge chawl tawhin a kaihruai dawn.
Prime Minister Narendra Modi-a pawhin X-ah chhiatna thleng chu ‘a pawi tak zet’ a tih thu a tar lang.
Tual chhung chanchinbuten video an tihchhuahah Vijay-a hi lirthei chunga dingin thu a sawi a, mi sang telin an kil kual tih a lang a. Thunun theih lohva mipui an awm hnuah a bul hnaia mangangte chu tui uma tui hmangin a theh lai leh hmanhmawh taka police a ko lai a lang bawk.
Vijay-a kaihhruai TVK hian an state-a rorel lai, DMK leh Modi-a kaihhruai BJP chu a campaign-naah hian nasa takin a sawisel a ni.