Hurricane chang tur Imelda-in South Carolina a pan mek

Thlivir insiam, Pathianni zana Tropical Storm Imelda-a insiam chuan South Carolina vaukam a pan mek a, tun karah hian hurricane-a chakh a insiam rin a ni a, Bahamas leh a bul hnai thliarkarah chuan an buai phah hle.
South Carolina Gov. Henry McMaster-a chuan khaw awm dan hi ngun takin an thlithlai reng tih a sawi a. North Carolina-ah pawh Gov. Josh Stein-a pawhin emergency a puang lawk bawk.
Khaw chin zirtute chuan Pathianni chawhnuah tropical storm-ah a insiam a, Thawhlehni zan emaw, Thawhlehni tukah emaw hurricane-ah a insiam dawn a, Imelda tih hming vuah a ni dawn tih an sawi lawk.
Pathianni chawhmaah khan Cuba khawchhak kil atanga hmarthlang km 161-ah hla, Central Bahamas atanga chhimthlang lam km 43-a hlaah a awm tih an sawia . Hmarchhak hawia darkar kata km 11-a chaka kalin thlipui darkar khata 55-a chak a keng bawk.
McMaster-a chuan ngun taka an thlithlai thu sawiin “He storm hi a hlauhawm tak zet a ni,” a ti.
Storm hian thli na tak leh ruah tam tak, tui tifawn thei a keng dawn tih a sawi lawk a. An state chuan mi zawn leh chhanchhuah hna thawktu tur pawh an inrintir tih an sawi.
Pacific Ocean-a thlivir dang, Hurricane Humberto erawh chuan Pathianni khan a chakna a hloh hret a, darkar khata km 240-a chak thlipui a keng niin Miami -a National Hurricane Center chuan an sawi a, Category 4 hurricane a ni a. Bermuda atanga chhim lam km 861-a hlaah awmin hmarthlang hawiin darkar khata km 20-a chakin a kal mek.
Tropical Depression Nine pawhin Cuba leh Bahamas tan ruah leh tui tilian thei khawp turin a awm mek a. Florida khawchhak leh Georgia tuipui kam pawhin ruah hi an dawng dawn niin an sawi lawk.
Pacific tuipuiah hian Tropical Storm Narda pawh a insiam a; mahse, Pathianni zan atang khan a chakna a hloh thut thung.
Narda hi a tirah chuan hurricane niin Mexico tuipui kam leh Baja California Sur-ah erawh ruah a thlen a, California chhim lamah pawh ruah a sur phah bawk.