Michigan-a Mormon biak in beihnaah mi pali thi

Michigan, US-a Mormon biak ina mi pakhatin a lirthei khalh luta inkhawmte a kah zuinaah mi pali an thi a, mi dang pakuain hliam an tuar bawk tih police-in an sawi.
Detroit hmarthlang lam km 96-a hla, Frand Blank khuaa Church of Jesus Christ of Latter-day Saints biak in beih a nih lai hian Pathianni inkhawm lai a ni a, mi za chuang fe an awm khawm lai a ni.
A titu nia an hriat, mipa kum 40 mi hian building pawh a hal zui a, thelh zui nghal a ni a. Biak in chhunga luha en fel a nih chuan thi leh hliam dang pawh an awm mai theih thu an sawi.
Grand Blanc Township Police Chief William Renye-a chuan biak in hi chawhma dar 10:25 (India-a zan dar 08:55) vela beih a nih lai hian inkhawm an tam hle tih a sawi.
A lirthei a khalh luh hnuah assault-style rifle a hmet puak zui a, ‘biak in chhungah hian silaimu thahnem tak a kap chhuak’ tih Chief Renye-a chuan a sawi.
Police-in rang taka hmachhawn nghalin officer-te nen ‘an inkap zui a, a hnuah a titu nia hriat hi kah hlum zui a ni’ tiin a sawi.
Silaiin a fuh mi pakuain hliam an tuar a, damdawi inah lak an ni a, thenkhat chu an dinhmun pawh a tha vak lo tih a sawi bawk.
A hmunah hian mi pahnih an thi nghal tih Chief Renye-a chuan thuthar lakhawmtute a hrilh a. A hnua a hmunhma an singsaknaah mi dang pahnih ruang an hmu zui leh bawk tih a sawi.
A titu hi kum 40 mi, Thomas Jacob Sanford, Burton, Michigan-a mi a ni a, biak in car hunna hmunah police-in an kap hlum zui a. Chhuitute chuan a chenna in leh a cell-phone record-te an endik nghal mek a, a tihchhan hriat an tum.
Grand Blanc police chuan a chhui hna thawknaah hian FBI agent 100 rualin an pui tih an sawi bawk a. Rin dan chuan tum sa renga beiah an ngai a, a tih chhan erawh hriat a la ni lo.
President Donald Trump-a chuan inkahna hi FBI-in sorkar laipui atanga a chhui hna chu an kutken dawn tih as awi a. Truth Social-ah ‘USA-a Kristiante beih an ni leh ta’ tih a tar lang.
Michigan Governor Gretchen Whitmer-i chuan thil thleng demin, “Tharum thawhna thleng hi khawi hmun pawh ni se, a bikin Pathian biakna hmuna mi phei chu a pawm chi loh reng reng a ni,” a ti.