Box office-ah ‘Showgirl’ a No.1
Box office-ah ‘Showgirl’ a No.1
Taylor Swift-i’n a album thar ‘The Life of a Showgirl’ tlangzarh puala film a siam ‘Taylor Swift: The Official Release Party of a Showgirl’ chu tun weekend kalta khan cinema hall-ah an tichhuak a, US-ah cinema hall ticket hralhna atangin dollar maktaduai 33 la lutin, box office No.1 a ni. Concert film a ni lo a, documentary pawh a ni chuang lo a, a album thar promotional event a ni deuh ber a, album a buaipui dan vel behind-the-scene leh he album-a hla ‘The Fate of Ophelia’ music video premiere nan a hmang nghal bawk a, minute 89 a sei a ni a, US pawnah dollar maktaduai 13 la lut bawkin, tihian opening weekend (opening weekend han ti deuh hluai ila, tun weekend kalta bak kha cinema hall-ah an tichhuak tawh dawn chuang lo)-a a lak luh zawng zawng chu dollar maktaduai 46 a tling.
Swift hian a album thar hi Zirtawpni kalta khan a tlangzarh ve nghal chiah bawk a, cinema hall lamah a promotional event a awm nghal bawk nen, album pawh hi a ni khatnaah US-ah copy maktaduai 2.7 an hralh thei a ni.
North American box office ranking hi weekend (Zirtawpni – Pathianni) chhunga US-a cinema hall ticket hralhna atanga sum chetvel dan atanga tehin siam thin a ni.
Dwayne Johnson film thar, Emily Blunt nena an chan dunna, wrestling drama ‘The Smashing Machine’-in beisei a pha lo a, opening weekend-ah dollar maktaduai 6 chiah la lutin, No.3 a ni. He film hi Venice Film Festival-a an premiere-naah boruak a nei hle a, Johnson-a performance-in fak a hlawhin, Oscar dawng thei tura beisei pawl pawh an kat nghal nuk mai a, mahse, cinema hall-a an tihchhuah takah chuan beisei a pha ta tlat lo.
Leonardo DiCaprio channa ‘One Battle After Another’-in weekend vawi hnihnaah dollar maktaduai 11.12 la lut lehin, No.2 a ni a, he film hian kar hnih chhungin US-ah dollar maktaduai 42.8 la lut tawhin, US pawnah dollar maktaduai 58.9 a la lut tawh bawk a, tihian a vaiin dollar maktaduai 101.7 a la lut tling ta. Hetihrual hian a film siam nana an senso dollar maktaduai 135 chu a la pha lo riau mai!
2022-a tlangzarh tawh ‘Avatar: The Way of Water’ chu 3D-in an tlangzarh thar leh a, cinema all ticket hralhna atangin dollar maktaduai 3.2 la lut lehin, No.7 a ni a, US pawnah dollar maktaduai 6.8 a la lut thei bawk a, tihian tun weekend kalta khan dollar maktaduai 10 a la lut leh thei a ni. He film hi kumin December thlaa tlangzarh tur Avatar film pathumna ‘Avatar: Fire and Ash’ tana boruak lo siam lawkna a ni deuh ber. ‘Avatar: The Way of Water’ hian dollar tluklehdingawn 2.3 chuang a la lut tling tawh a ni.
Box Office Top 10:
1 Taylor Swift : The Official Release Party of a Showgirl $33,000,000
2 One Battle After Another $11,125,000
3 The Smashing Machine $6,000,170
4 Gabby’s Dollhouse: The Movie $5,200,000
5 The Conjuring: Last Rites $4,050,000
6 Demon Slayer -Kimetsu no Yaiba- The Movie: Infinity Castle $3,500,000
7 Avatar: The Way of Water $3,194,000
8 The Strangers: Chapter 2 $2,800,000
9 Good Boy $2,253,000
10 The Long Walk $1,700,000