Crystal Palace an tlawm ve ta

Pathianni zan khan English Premier League 2025-26 khelh chhunzawm a ni a, season tharah tlawm nei lova kaltluang mek Crystal Palace chuan Everton laka an hmahruaina an humhim zo lova, a vawi khat nan an tlawm. Palace an tlawm lai hian Manchester City in hnehna an chang a, panganaah an inhlangkai ve thung.
Khawvela tualchhung League harsa berah ngaih EPL-ah tlawm nei lova kal tluang awmchhun Crystal Palace hi Everton hmachhawn turin Goodison Park-ah an lenglut. An len luhna mualah bul an tan tha a, goal thun hmasa zawkah an tang. Goal thun hmasa bawk mah se penalty an chawi vangin an hmahruaina an humhim thei lova, hun pek belha Jack Grealish goal thun hmangin lehthal an ni. Everton hian an mikhual Crystal Palace hi 2-1 a hnehin tlawm nei lova vawi 19 zet an kal tluang lai an tihtawpsak.
Goodison Park-a lenglut Crystal Palace hi an hnuaia awm Everton lakah an khel tha leh viau a, Daniel Muñoz chuan minute 37-naah hmahruaina goal a thun. Munoz goal thun hmang hian hun rei tak chhung hma an hruai a, Mimualah chak theih beiseina sang tak an nei hman. Everton lakah point thum hmuh ngei tum viau mah se an vannei reng thei bik lova, penalty an chawi. Penalty an hmuh hi Everton tan Iliman Ndiaye chuan minute 76-naah a pet goal a, an si phurh a sut.
Goal khar ve ve an thun hnuin inkhel a hmuhnawm leh zual a, goal thun tumin an innawr tawn nasa hle. Inkhel hmuhnawm takah goal a luh belh lawk thei lova, Everton leh Palace hi an inhnehtawk mai a rinawm hman viau. Goal a luh belh theih loh reng hnuin mualneitu Everton chu hun tawp dawn hnaihah an che fuh a, hun pek belh minute 90+3-ah loan-a an hawh mek Jack Grealish chuan Palace laka hma an hruai letna goal a thun. Grealish goal thun hi Eagles in hun tawp thlengin an sut theih tawh lova, Toffees lakah uiawm takin a tlawm a, season tharah a vawi khat nan tlawm ni hmel an hmu ve ta nge nge.
Crystal Palace hi season liam ta tawp lam atang tawh khan inelna hrang hrangah an khel tha tluang viau a, tlawm nei lovin khelh 19 chhung ngawt an kaltluang. EPL season tharah club lian leh hausa zawk Manchester United, Manchester City, Chelsea, Liverpool leh Arsenal te an tlawm vek tawh laiin an la tlawm ve lo. EPL 2025-26 a tlawm nei lo awmchhun ni bawk mah se Everton in an kaltluang lai an tihtawpsak ta a ni.
Everton lakah tlawm mah se Crystal Palace hian khelh 7 atanga point 12 hmuin parukna an luah a. Everton hian khelh 7 atanga point 11 hmuin pariatna an luah ve thung. Palace hnehtu Everton hian khingpui hautak tak an neih zui a ngai dawn a, international break zawh, October ni 18-ah Manchester City hmachhawn turin Etihad Stadium-ah an len luh a ngai dawn. Palace pawhin khingpui hautak an nei zui ve dawn bawk a, an mahni ang thova season hmang tha AFC Bournemouth an hmachhawn zui leh dawn a. Palace hi chu an mualah an inlan dawn thung.
Haaland bawk
Pathianni zanah season bul tan tha tak Crystal Palace an tlawm laiin season bul tan tha lo Manchester City in hnehna an chang ve thung. City chakpuitu hi tu dang ni lovin Erling Haaland bawk a ni.
Team lian Manchester City hi Brentford hmachhawn turin Gtech Community Stadium-ah an lenglut. Mikhual an nihna hmunah an khel tha viau a, goal an thun hma hle. Season tharah club leh ram tana goal thun reng mai Erling Braut Haaland chuan inkhel tan atanga minute 8-na lekah Brentford laka hma an hruaina goal a thun nghal. Haaland hian season thara inelna hrang hrangah goal 15 a thun tling der tawh a, EPL player dangte aiin goal kua ngawtin a thun tam zawk mek. Goal thun thulh hleithei lo Haaland hian Etihad Stadium-a EPL a hmachhawn hnuhnung vawi 23-ah goal 22 zet a thun a, an muala goal a thun hi 96% zet a ni a, a che tha rem rem hle.
City hian Haaland goal thun hmangin hnehna an chang a, point thum hmuh belhin khelh thum atangin point 13 an hmu a, pa 5-naah an inhlangkai. City manager Pep Guardiola chuan City hi EPL-ah vawi 349 kaihruai tawhin vawi 250 hnehna a chanpui tawh a. Manager zingah EPL-a vawi 250 chak tura game mamawh tlem ber a ni nghal bawk. Game 349 a kaihruainaah City hi vawi 49 an tlawm tawh a, draw vawi 50 an nei tawh bawk.