Myanmar sipaiten pung khawm an beihnaah mi 24 thi

Myanmar sipaiten pung khawm an beihnaah mi 24 thi
Myanmar-a sipai sorkar duh lohna lantira pungkhawmte sipaiin paraglider hmanga bomb pahnih an thlak hnanah mi 24 vel an thi a, mi 47-in hliam an tuar bawk niin an rama sorkar pakhat zawk thupuangin BBC Burmese a hrilh.
Sipaiten mipui an beih hi Thawhtanni tlaia thleng niin an ram laili, Chaung U khuaa national day hmanga mi 100 vel punkhawmnaah a ni.
Kum 2021-a sipaiten mipui sorkar paih thlaa thuneihna an chan leh hnuah mi sang tel thi tawhin maktaduai tel baihvaiin an awm tawh a, sipai sorkar duh lo hel pawl tam tak nen inbeiin tual chhung indonain a tuam mek.
An ram zahve aia tam an hloh hnuah sipaite hian rawng tak taka thlawhna hmang leh bomb hmanga bei letin ram an zauh leh hret hret tawh.
Thawhtannia thil thleng ang pawh hi Myanmar-a sipaite hian kumin chhung ringawt pawhin vawi tam tak an lo ti tawh a ni.
Sipai sorkara air force chuan tun hnaiah China atangin drone an la lut nasa a, anni hi sipaite thlawptu an ni a, thiamna lamah Russia pawhin a pui nia hriat a ni.
Thawhtannia thil thlenna hi Sagaing region-ah niin mipuite hi thla bial an lawmna, Thadingyut pualin an pung khawm a, bati an chhi bawk.
Sipai sorkar an duh lohna hi muanawm taka lantir nia sawi an ni a. Mipui sorkar hruaitu, Aung San Suu Kyi-i telin politic thila mante chu chhuah an phut bawk.
Sagaing region hi indona tamna niin hmun zau tak chu sipaite do tura inpeten an thunun a ni.
Sipai do tura inpe, People’s Defence Force (PDF) tia an sawite hian tual chhung inawpna pawh an thunun a. Tual chhung PDF hruaitu pakhat chuan Thawhtannia pun khawm hi van sang atanga beih mai thei nia hriatna an nei lawk niin BBC Burmese a hrilh.
Punkhawm hi tihtawp thuai an tum a; mahse, paramotor, tual chhung miten paraglider an tih bawk chu an rin aia hmaa a lo thlen thu a sawi.
Minute sarih lek chhungin thil a thleng a, thil puakah amah pawh a ke a tina a, a bul lawka mite pawh an thi tih a sawi a. Tual chhung miten ruangte chu tute nge an nih finfiah hna an thawk tih a sawi bawk.
Thawhlehni khan Amnesty International chuan thuchhuah siamin sipaite chet dan chu ‘chin dan tha lo tak’ tiin a sawi.
Sipaite hian thlawhna leh helicopter bakah thlawhna tui an neih tam tawk loh avangin tun hnaiah paramotor hi an hmang uat hle.
Ram tam takin Myanmar-a roreltute hi an hrek avangin sipai hmanrua neih an harsa a; mahse, tun hnaiah China leh Russia bakah ram dangte pawhin an pui nasa a, an nei thar veleh nual tawh.
Myanmar hian December-ah inthlanpui huaihawt an tum a, hei hi kum 2021-a sipaiten thuneihna an chan hnua a hmasa ber tur a ni a. Hetih lai hian mi tam tak chuan zalen leh dik taka inthlan a awm dawn lo va, sipaiten an rorelna sawh nghehna atana an tih mai a ni tih ans awi a. Eptu party tam tak an awm khap a ni a, vote pawh an thunun chin, an ram zahve velah chauh thlak thleih a nih a rinawm niin an sawi.