Tiamchin awm loin Mamit panna kawng thum dan tum

Sawrkarin Mamit panna kawng a siam dan duhkhawp loh avangin Mamit to Aizawl, Mamit to Bairabi leh Mamit to Zawlnuam chu tiamchin awm loa dan tum a. Hetihlai hian inbiakna a kal mek a, chanchin a danglam thei tih thu dawn a ni. All NGO’s Mamit leh Commercial Vehicle Association Mamit thuchhuak chuan, Mamit district tana châk lakna leh veivahna kawngpui pawimawh – Mamit to Aizawl, Mamit to Bairabi leh Mamit to Zawlnuam chu lirthei eng chi tan pawh kal hleihtheih loh khawpin a chhia tih an sawi a. Chhuanlam ho te te siam tawh loa a rang thei ang bera siamthat a nih theihnan Mizoram sawrkar an lo ngen tawh tih sawiin, October 4-12 chhung sawrkar hmalakna an ngaichang a, sawrkar hmalak dan a hmunah an enfiahin, hmalakna mumal leh beisei anga hnathawh a awm lo tih an hmuh thu an sawi.
An dinhmun hetiang a lo nih tak avangin kawngpui hi sawrkarin siamtha tura a taka hma a laksak hma loh chuan, October 16 (Ningani) atangin heng kawngpui – Mamit to Aizawl, Mamit to Bairabi leh Mamit to Zawlnuam hi tiamchin awm loin eng lirthei mah kaltlang theih loha dan chah an tum tih an sawi a ni.
‘Hetianga hma lak a ngai hi a pawi kan ti a, kawng hrang hranga harsatna thleng thei lakah mipui hriatthiamna leh thlawpna kan ngen a ni,’ an ti.