Hmeichhia hriatthiam ang har i ti em?

Hmeichhia hriatthiam ang har i ti em?
Hmeichhia chu a thil duh leh mamawh ni a inhriat te chu i hriatthiam pui lo fo vang. A awmdan leh chetdan te pawh hriatthiam loh chang i ngah ang. Mahse, hei le, relationship lama mithiam ten i hriat thiam loh thin te chu an rawn chhan sak ta hlauh mai che.
1. Pheikhawk keartui sang zet mai a bun a, a ke na a ti leh si a. Chutih laia a rilruah chuan a pheikhawk chuan a ke a tilang sexy riauin a hria a, bun hrehawm deuh mah se a pawi ti lo.
Engtin nge i tih ang: Chutiang pheikhawk chu bun lo tura thlem tum buai duh suh, pheikhawk flat a sexy anga ngaih tir te pawh tum buai duh suh, a ruk tak chuan nang pawhin a high heels khan a ke a ti lang sexy-in i hre ve tlat! A ke kham veleha a thut mai theihna tur te lo ngaihtuah sak zung zung la, fel nih i hlawh mai ang.
2. A thian tha ber emaw i tih pawh kha darkar 24 chhung lekin a mi ngei berah a chang thei a, darkar 48 dang a ral leh meuh chuan a thian tha ber a ni leh der thei tawh. Ani chuan. “Hmeichhia te chu kan tawng tam a, ngaihdan inan loh chang pawh kan ngah,” a ti then mai ang.
Engtin nge i tih ang: Mak i ti viau em, boxer te pawh an inhnek thi zawih zawih a, mahse, a tawpah chuan inkawmngeih tak ang maiin an inkuah leh thei mai a ni lawm ni? Chutiang nen chuan an danglam lutuk lo. Lo hmakhalh la, a tawp dan tur lo mitthla la, i buai tam lo a ni mai.
3. Incheina chungchanga tu thu ziak emaw a chhiar vang mai pawhin thau leh cher angin a inngai tlat thei. Ani chu puitling ve tawhah a inngai a eng kekawr emaw, lip gloss emaw perfume emaw khan a landan a thlak danglam tak tak theiin a ring miau alawm.
Engtin nge i tih ang: Engmahin a tilang thau lo angah i ngai tur a ni a, a thawmhnaw hak te chuan a tilang slim zaih angin i ngai tlat tur a ni. Chuti lo zawng mawl a ti lutuk ang che.
4. A ril a tam thut a, ei tur a duh nghal a. Ani chu midang buaipui reng reng a hmanhlel a ni a, amah pawh a inngaihsak hman lo!
Engtin nge i tih ang: Sawibuai duh suh, phunchiar pawh ti suh, a ei tur zawng vat vat la, tichuan pa tha i ni mai.
5. Thawmhnaw inang tak tak a nei fo ang. ‘hei hi eng nge a an?” tiin a’n zawt ve bawk che ang a, nang chuan, i sawi loh tur sawiin, “Khatiang kha chu i nei tawh a ni lawm ni?” i’n ti ang a. A melh vak che ang a, a inan loh dan leh a neih tawh sa aia a thatna leh a nalh zawk dan te a hrilh hrep mai ang che.
Engtin nge i tih ang: “Khatiang chu i nei tawh a ni lawm ni?” ti lo vin, “A that kha,” lo ti liam ve satliah mai rawh. Tichuan, Valentine’s Day-a pek tur te pawh i hrethiam nghal kuar mai ang- a thil neih tawh sa ang deuh kha a ni mai!
6. Zan khat thil thuah ei duh loh te a lo nei leh thut thin. Magazine hrang hrangah mi ti thau thei chi hrang hrang an chhuah te a chhiar uluk thin vang a ni.
Engtin nge i tih ang: A ei duh loh chu fak lui chiam suh, i ei tir thei chuang lo vang, bakah a ei leh in tur thleng thlenga rorel tumah a puh mai ang che.
7. A insiam chhung a rei thei hle a, nghah deuh reng a ngai ang. A jeans hak thlak tur ngawt pawhin darkar chanve te a duh hial maithei. Ani chuan nalh tur chuan inuluk a ngai a, inuluk tur chuan hun a ngai a ti ang. Make-up te, sam pawh ngil te a tih vek tawh hnuah pawh, “Hei pawh kan ti leh lawk,” tih tur a nei thei zel.
Engtin nge i tih ang: Hemi chungchangah kher kher hi chuan tih theih i nei lo, dawhthei takin nghak mai rawh.
8. Darthlalang chu a thian tha ber ang maiin a ngaina a, a hmalam leh hnunglam nen, a sir zawnga a lan dan nen lam a inthlir uluk hle ang. Hnunglam atanga a landan te pawh a pawimawh tlat, miin an en zui dawn tlat a!
Engtin nge i tih ang: Engmah tih theih i nei lo, nalh taka a awm khan nangpawh i mit a tlai a ni mai. A kekawr kawng hnunglam atanga a keste rawn lang, amah pawhin a hriat ruk reng, te kha hmuhnawm ti deuh lo thlir mai rawh.