FCAA duhlohna lantir dawn Kawngpuiah inennawn a ngai – Joint Civil Society

FCAA duhlohna lantir dawn
Kawngpuiah inennawn a ngai
– Joint Civil Society
Forest Conservation (Amendment) Act 2023 chu a ngai ang anga hman an duh loh avangin October 17 zan hian duhlohna an lantir dawn tih Joint Civil Society chuan an sawi a. Mizoram kawngpui that theih loh chhanah sawrkarin a inrelbawlna lam thlenga a ennawn a ngai nia an hriat thu an sawi bawk.
Environment humhalh bakah ram leh khawtlang tha duhna avanga pawl ding ho intelkhawmna – Joint Civil Society of Mizoram (JCM) chuan FCAA 2023 a nih ang anga pawm a him loa, sut leh ngei turin legislator-te an ngen, tih chu an dinna a la ni reng tih an sawi.
FCAA duhlohna leh ram roreltuten an thu rel tawh sut tura ngenna bakah Article 371G chawinunna atan October 17 zan hian JCM chuan bati chhi-a an thil duh lantirna ‘candle light vigil’ an nei dawn a; a huho emaw chhungkua emawa nei ve turin mipui an chah tih an sawi.
JCM convener Lalrammawia chuan Forest hotu thawk mek zingah FCAA him loh dan sawi ngam an awm a rinawm loh laiin, chawl tawh zingah sawi duh an awm tih a sawi a. Supreme Court-a khingtu zingah pawh Indian Forest Service atanga chawl tawh an awm tih a sawi. “Hmasawnna hi kal se tha kan ti, mahse, kan environment hi dam rawh se,” a ti.
JCM convener dang Lalbiakmawia Ngente pawhin zawhna chhangin, FCAA 2023 chu a vai vaiin tha lo an ti a ni loa, Nagaland pawhin a vaia pawm an duh loa, an state tana him chin an pawm mai angin, state tan leh Article 371G a khawih buai lohna tura pawm mai chu an duh dan a ni tih a sawi.
Tunhnaia kawngpui dinhmun an fankuala an zirnaah, kawng chhiat chhan chu PWD leh sawrkar laipui hnuaia kawng enkawltute inthlahdah vang a nih bakah truck lian tir phutin kawng an zawh nasat vang a ni tih chu an hmuh dan a ni tih JCM hian an sawi bawk.
Kawng enkawltuten an thawmthat chak tawk loh laiin, lirthei phurh rit theih zawng endiktu Transport department leh Legal Metrology lamin kawng dinhmun ngaihtuah loa an lo enliam thin vang a ni tih an sawi a. Hengte ngaihtuah hian sawrkarin department thawhdun dan tura inrelbawlna lam thlenga an inennawn ngam a ngai tih an sawi.
“Truck Owners Association lam zawkin truck ke 12 aia tam nei chi chu engemaw pawimawh bik thil a nih loh chuan, luh tir lo turin sawrkar hotute an lo ngen tawh a, bawhzui a hlawh lem lo,” Lalrammawia chuan a ti.
JCM hruaitute chuan kawng chhiat avanga lirthei chhiat phah an awm a nih chuan, document fel tak an neih phawt chuan, zangnadawmna dil turin thuneitu lam a ni emaw court a ni emaw bawhzui pui an inhuam reng tih an sawi.