Kawng chhe nasa leh tawh
Mizoram kawngpui pawimawh National Highway 306 a chhia a, tun hnaiah a chhe zual, a chhe nasa leh tawh viau a ni awm e.
National Highway 306-ah hian Sairang leh Khamrang inkar a chhe zual a, a chhe zual lai hi tun hnaiah a chhe zual leh, lirthei tlu te pawh a awm leh tawh.
‘Kar hmasa, chumi hma kar te pawh a ni tawh, khang lai atang khan Sairang leh Khamrang inkar hi a chhe nasa leh tawh a, hmun thenkhatah chuan a hmaa a chhiat vanglai ang mai kha a ni leh tawh,’ Mizoram Truck Drivers Association hruaitute chuan an ti.
Lirthei intlar a awm leh tawh a, lirthei a tan nasat leh tawh bakah traffic a jam nasa leh tawh a, lirthei tlu pawh a awm leh tawh an ti. Tun hnaiah lirthei pahnih pathum a tlu tih an sawi.
‘Hnam dang hi an khawngaihthlak a, an ti hlei thei lo. Tun hnaia lirthei tlu pawh hi hnam dang khalh vek a ni a. Hnam dang driver hian an sim a, an rawn tlan tha duh lo telh telh a, hei vang hian lirthei pawh a hma angin a tawt mup mup lo,’ an ti.
An sawi danin, Aizawl atanga chhuak, lirthei ruak pawh Sairang leh Khamrang inkarah hian ni thum te an thang a, kawngah a chhuak lam leh a haw lam an thang rei leh telh telh tawh. Aizawl pantute pawh zan lite an tang a, Nilaini tlaiah khan lirthei intlar hi 500 vel an ni awm e.
National Highway 306 chhia hian nikum lamah nasa takin mipui a lo nghawng tawh a, kuminah July thlaah khan nasa takin mipui a nghawng leh. Chak zawka kawng siam a nih theih nan August ni 2 atanga ni 7 thleng khan sorkar thu angin lirthei an ding a, chumi hnu rei vak lo chu kawng hi a zia deuh. Mahse September-ah a chhe hman hle tawh a, a chhe leh telh telh tih chu ni tina tlan lirthei khalhtute sawi dan a ni.
Lirthei ang thang rei avangin bungrua pawh a thleng muang a, thu dawn danin chawlhkar liam taah bawnghnute a thlen loh hnuah, Thawhlehni (October ni 14) khan bawnghnute hi a thleng. Bawnghnute hi a vang hman lo vel chiahah ngaih a ni.
Mizoram Truck Drivers Association hruaitute chuan kawng siam hna hi thawh tak taka thawh a awm lo nia a lan thu an sawi a, ni tina tlante’n hnathawk an hmuh ngai meuh loh thu, hmun thenkhatah chuan mi pahnih pathum emaw an lo awm ve chang a awm chauh thu an sawi. Tun hnai teah erawh, chhunah hna an thawk a, chu chu lirthei ding a tam chhan pawh a ni an ti.