Kristianna leh BJP inhal anga ngaih hi politics inchirhthehna – Dr K Beichhua

Kristianna leh BJP inhal anga ngaih hi politics inchirhthehna
– Dr K Beichhua
Kristianna leh BJP inhal anga ngaih tlatna chu politics-a inchirh thehna mai a ni tih BJP hruaitu Dr K Beichhua chuan a sawi.
Zirtawpnia an BJP State office-a inkhawmah an party president Dr K Beichhua chuan, Hindu ram tih theih India rama kan awm chu a lawmawm tih a sawi a. Hindu-te chu thinnel leh zaidam tak niin, thenawm ram Muslim ram enin kan vanneih zia a langchiang tih a sawi. “Muslim ramah awm ta ila, nun ralmuangin kan hmang lo hialin a rinawm. Kan Kristianna leh BJP inhal anga kan ngaih tlatna hi, politics-a inchirh thehna mai a ni tih kan hriat a, BJP hi Mizoram mamawh chhanna atana kan mamawh ber a ni,” a ti.
BJP chu thalaite ta a ni a, Mizoram khawpui ber Aizawlah thalai tam takin BJP an rawn zawm ta hian, thalaiten thil tak tak an duh tawh a ni tih a tichiang tih BJP Mizoram hotu hian a sawi. “Tun hun hi thalaite khawvel a nih angin, development-a tuihal Mizo thalaite lo lut zel turin kan sawm a ni,” a ti.
Dampa bial by election awm turah party dangten hma takah candidate puangin, campaign an kalpui mup mup a, tunah a vawrtawp an thleng tan mek a, kal ngaihna vak an hre tawh lo niin a sawi. BJP erawh candidate an puang har a, campaign an tan ve chauh a ni a, an boruak a tha em em thung nia sawiin, tun thla chhung hian Dampa bial hmasawnna atan Union minister-ten campaign an rawn hmanpui dawn tan a, an party hmabak a eng em em tih a sawi a ni.