MNF president-in an candidate a campaign pui awm hriat ani lo – ZPM

MNF president-in an candidate
a campaign pui awm hriat ani lo
– ZPM
Dampa bial by election neih turah MNF candidate chu an party president berin a campaign pui awm thawm hriat tur a awm lo chuan an party chungah mipui ngaih a tha thei lo tih ZPM party chuan an sawi.
ZPM Dampa Bial By Election Committee thuchah tihchhuahah, Dampa biala MNF candidate chu MNF president Pu Zoramthanga’n a campaign pui thawm hriat tur a awm lo tih sawiin, ‘Hei hian MNF party chunga mipui ngaihthat lohna a tizual a. Dr R Lalthangliana hi MNF party-ah a lâng tawh hle em ni, tih hi mipuiah zawhna a ni,’ a ti.
Dampa bial chu sawrkar hmasate enkawlna hnuaiah hmasawnna in a kalkan bial an nih avangin an harh chhuak tawh a, ZPM sawrkarah hmasawnna nasa tak hmu turin an rilru an siamfel tawh tih a sawi.
MNF treasurer-in ZPM-in an candidate thlak tumna awm anga a sawi chu a sawi awm tawkah an ngai tih a sawi a. Dampa bial by-election ah ZPM chuan lungsi takin candidate atan Pu Vanlalsailova an chhawp chhuak a, an phur tlang hle a; minister leh MLA ten campaign rusum an thlak mek zawk tih a sawi a ni.
‘MNF sawrkar laiin Revenue minister hriatpui lohin house pass dilna lak chhuah theih a ni loa, mirethei leh harsa zawkten Revenue minister thut hun an chang ngar ngar thin. ZPM sawrkarah chuan awlsam takin online-in house pass an dil thei tawh a, mipui sawrkar dik tak kan hmu tawh a ni. Hei hi entirna pakhat chauh a ni. MNF sawrkara 25% tih thawm ri thin pawh ZPM sawrkarah chuan a reh ta,’ thuchah chuan a ti bawk.