Agriculture land survey nei dawn

Agriculture land survey nei dawn
Digital Agriculture Mission peng pakhat, Agristack atana agriculture land survey chungchang sawihoin Agriculture & Farmers’ Welfare minister PC Vanlalruata leh Land Revenue & Settlement minister B Lalchhanzova-te kaihhruaiin a kaihhnawih department – A&FW, LR&S, Horticulture leh District Council & Minority Affairs hotute Thawhlehni khan an thukhawm.
A&FW minister chuan Digital Agriculture Mission chu mission namai lo a ni, tiin, sawrkar hmalakna atana data neih that a pawimawh a, data hmang chuan loneitute thil mamawh nena tuahrem an ni thei dawn tih a sawi a ni.
LR&S minister pawhin department chu inmamawh tawn an ni, tiin, mumal taka thawhhona atan convergence framework changtlung neih a rawt a. Thawhhona tha rah chu ram tan leh loneitute tan hmasawnna leh thlamuanna a ni dawn tih a sawi.
He thutkhawm hi district hrang hrang atangin bawrhsap, Autonomous District Council hruaitute leh department hotuten inbiak hmuh theihna hmangin an chhim a. A&FW special secretary Ramdinliani leh LR&S commissioner & secretary Vanlalmawia ten an department hmalakna leh hmabak an sawi a ni.
A&FW chuan digital crop survey an kalpui that avangin SASCI hnuaiah cheng vaibelchhe 50 bakah hmarchhak state tithate tana cheng vbch. 10 belh an dawng thei dawn a. LR&S pawhin Bana Kaih Scheme hnuaia Chief Minister’s Land Reforms Programme atangin cheng vbch. 5 an hmu dawn a ni.
A&FW deputy director Simon Rosangliana chuan Digital Agriculture Mission chungchangah presentation pe in, Mizoram chu hmarchhak state zinga digital crop survey kalpui thei state pahnihna a ni tih a sawi.