Mizoram health centre 530 ah ni zung chakna hmang power
Mizoram health centre 530 ah ni zung chakna hmang power
Mizoram district hrang hranga Health Centre hmun 530-ah nizung chakna hmanga power siam chhuahna tur bunfel a ni.
SELCO Foundation-in solar power system a bun hi Ningani khan Health & Family Welfare department hotute kutah an hlan a. Hmanpuitu Planning secretary Lalmalsawma Pachuau chuan sawrkar hotute leh SELCO Foundation zarah hmarchhak state zinga state puma health centre-te nizung chakna power hmanga thuam kim thei hmasa ber kan ni chu lawmawm a tih thu a sawi a. Sik leh sa inthlak danglamah pawh health centre-ten harsatna an tawh thin a sutkian beisei a ni tih a sawi.
Health Centre hmun 530 – Sub Centre/ Health & Wellness Centre 379, Primary Health Centre 69 leh Health Clinic 82-ah sawlar power system dah niin, Mizoram mipui district 11 a awmte chuan nau neih leh naupang hriselna, hri danna leh thildangah awlsam zawkin an hmang tangkai thei dawn a. Hriselna lama thawktu mi 3000 chuangin him leh tha zawkin hna an thawh theih phah dawn tih sawi a ni.
Ni zung chakna siam chhuah belhkhawm mi megawatt 1.1 a ni a, hei hian kum 20 chhunga boruak thianghlim lo tonne 53260 hu vel siamchhuah tur chu a ti bo dawn tih SELCO Foundation hotute chuan an sawi.
SELCO Foundation chief executive officer Dr Harish Hande chuan, he hmalaknaah hian Directorate of Health Services-a walk-in cold storage bun pawh a tel a, hei hi NE states-a 5 metric tonne dual-chamber solar powered unit hmasa ber a ni a, hri danna leh damdawi dangte dahthatna tura siam a ni tih a sawi.
Hei hi SELCO Foundation leh Directorate of Health Services tangdun hmalakna a ni a. He storage ah hian power khaihlak awm loin damdawi a dahthat theih dawn a ni. IKEA Foundation, Ashraya Hastha leh LIC Housing Finance Ltd CSR puihna in heng hmalakna hi tihhlawhtlin a ni tih a sawi bawk.