Khawpui enkawl leh bawlhhlawh sawngbawl dan Vietnam-ah zirho
Khawpui enkawl leh bawlhhlawh
sawngbawl dan Vietnam-ah zirho
Aizawl mayor Lalrinenga Sailo hoin October 14 & 15 khan corporator zawng zawng chuan AMC hmasawnna tur leh khawpui ruahmanna tha neih theihna tur leh faina lama mumal zawka hma lak a nih theih nan Municipal & Urban Planning department leh Waste Management Centre Hanoi Vietnam-ah an training.
Hanoi Municipal and Urban Planning Department leh Sanitation and Waste Management Centre hotute nen inkawmin an sawiho a. An hnathawh dan hrang hrang an lo entir bakah an khawpuia bawlhhlawh sawngbawl dan presentation an lo buatsaih a. An khawpui thang zel tur atana bawlhhlawh paih leh bawlhhlawh sawngbawl kawnga ruahmanna leh hma an lak dan an lo hrilhfiah bakah Aizawl Municipal Corporation system tihchangtlunna atana hmalakna tur sawiho a ni bawk.
Sanitation and Waste Management Center an tlawhnaah Municipal-in bawlhhlawh a khawnkhawm dan, thliarhran dan leh paih dan zirchian a ni.
Sanitation system hi manual leh mechanized cleaning-in an kalpui a, khaw te deuh leh khawpui hlui zawk pawh a thianghlim reng theihnan hma an lak dan zirho a ni.
Aizawl mayor leh corporator-te hian Aizawl khawpuiin environment thianghlimna kawnga hma a sawn theihna tur leh ram khawpui ruahmanna tha atana entawn tur tam tak an zir chhuak tih an sawi a. Dan mumal tak hnuaia hma lak tul zia, mipui tawiawmna pawimawh zia, ram leilung mila hman tangkai thiam a tul zia, ramngaw humhalh tul zia leh khawpui zauh kawnga awmze neia hma lak a ngaih zia zir a ni tih an sawi.