Si li faia Brugge veltu Bayern

Si li faia Brugge veltu Bayern
Allianz Arena chhunga fans 75,000 tehreng su bulh bulh karah mualneitu team Bayern Munich-in an mikhual Club Brugge lakah zahngaihna an lantir lo kher mai a, tan atanga minute 5 a liam hma hretin rawlthar kum 17 mi lek Lennart Karl chuan goal hmahruai a khung er zawk a, German player zinga he competition-a goal thun thei nauang ber hi man-of-the-match atan thlan a ni zui ta nghe nghe.
First half-ah hian England captain Harry Kane leh Luis Diaz-te’n goal khat ve ve thawh belhin, substitute Nicolas Jackson chuan second half minute 79-ah si li faia Bavarians chakna goal a khung ve leh a; tun season Champions League-ah match thum khelin Bundesliga giants an la chak fai vek a, point kua hmuin, chute zat bawk hmu vetu Paris St Germain hnuai chiahah awmin table-ah pahnihna an luah.
A tir lam minute 34 chhunga goal thum ngah hman German champion khan tun season inelna hrang hranga match 12 an khelh tawhah hnehna la chang fai vekin, Champions League knockout stage luh pawh an hnaih leh kuar tawh.
Inkhelh banah tunhnaia Bayern boss ni rei lehzual tura contract thar ziak hlimhlawt Vincent Kompany chuan a naute khelh dan fakin, home game tha zet an khelh thu leh an player naupang zawkte fak tlak an nihzia hahipin a sawi a, a bik takin goal hmahruai thawhtu Lennart Karl kha Nilaini zan home match-a an plaer pawimawh a nih thu leh team tanpuitu lian a nih thu a sawi.
Belgian coach hi young player fak kawngah a fimkhur viau thung a, khati zela a khelh taht chuan khelhna hun a chan zel theih tur thu a sawilang duh deuh chauh rih!
Bayern hian an khelh leh turah November ni 4 khian hmahruaitu leh defending champion ni bawk PSG an luhkhung dawn a; a tuk zanah khelh thuma point thum hum chunga table-a 20-na thut mek Brugge-in Barcelona an mikhual ve thung ang.
Inkhel dang
Atalanta leh Slavia Prague chu goal awm loin an inhnehtawk ve thung.
Gewiss Stadium, Bergamo, Italy-a Nilaini zan inkhelah team pahnihin goal thun theihna chance an nei nual ve ve a, an keeper-te’n save tha tak tak an lantir a, hun pumin goal lawm tur an nei ta lo a ni.
Paris St Germain an luhkhung tuma si li faia lo tlawm tawh Atalanta khan Club Brugge laka 2-1 hnehna an lo chan tawh nen point li khawl chungin table-ah 17-na an luah a; an bultanna inkhela mikhual Bodo/Glimt nena 2-2 draw neihpui, a hnua Inter Milan muala si thum faia tlawm zui leh Slavia khan point hnih nei chungin table-ah 28-na an thut.
Sporting CP 2-1 Olympique de Marseille
First half tir lama goal khung chunga half time thlenga si khat faia hma ruai thei Ligue club khan first half hun pekbelha an player Emerson Palmieri hnawhchhuah a ni kha second half-ah an tuar ta a ni.
Minute 14-na leka Igor Paixao goal hmangin mikhual team-in hma an hruai zet a, chawlhlawk dawna yellow card vawi hnih hmuh vanga referee Rade Obrenovic hnawhchhuah tawk Palmieri khan Marseille tanhmun a tiphet zo ta a ni!
Second half-ah Geny Catamo (69’) leh Alisson Santos (86)-te’n mualneitu team chakna goal pawimawh pahnih an khung a, Estadio Jose Alvalade, Lisbon, Portugal-ah Sporting an nui hnuhnung ta zawk a ni!
Ligue 1 hmahruaitu Marseille kha inelna hrang hranga match nga chak zawn lai niin, an chak record kal tluang lai an hum zawh tak loih avangin point thum an neih tawh nen table-ah 18-naah an tlahgniam a; he competion-a vawi hnih chak tling ta Sporting erawh point ruk nen 11-naah an chho thung.
Galatasaray chuan an Norwegian mikhual Bodo/Glimt chetsual pheng phung hlawkpuiin Nilaini zan Champions League inkhel dangah 3-1 hnehna an chang a; striker Victor Osimhen chuan first half-ah Turkish club tan goal hnih khungin, second half tir lama unus Akgun goal khat thawh ve leh nen si thum faiin mualneitu team-in hma an hruai phawt.
Second half laihawlah Bodo substitute Andreas Helmersen chuan consolation goal khat tilut ve bawk mah se chu bak home team-in goal dang an chhuahbelh duh tawh lo.
Istanbul club lian Galatasaray hian khelh thuma point ruk hmuin 14-na an luah a, away-ah Dutch side Ajax Amsterdam an luhkhung leh ang.
Point hnih hum ve tawh chunga 26-na thut nghet charh Bodo/Glimt hian chawlhkar hnih hnuah Monaco of France an mikhual ve thung ang.
Spain lama inkhelah Athletic Bilbao chuan an thah fel hnu lawka goal khat chhuah nghal pang hungin first half tawp dawnah an siphurh an sut hman a; seond alf-a goal hnih dang khung belhin Azerbaijan club Qarabag FK lakah 3-1 hnehna an sualchhuak ve ta hram a; San Mames stadium-a an result hlawhchhuah kha tun season Champions League kal laia an point hmuh hmasakber niin, table-ah 21-na an luah.
La Liga club Bilbao hi an match hmasa pahnihah Arsenal leh Borussia Dortmund hneh loin an tlawm tawh a; hetih lai hian Azerbaijani club Qarabag erawh an game hmasa pahniha Benfica leh Copenhagen lo hneh tawh ngat ni thungin, Spain ramah chesual mah se an point thum ruh tawh hmangin table-ah 13-na lai an la thut pha.
Bilbao hian November ni 5 khian Newcastle United an luhkhung leh dawn a; he mi zan vek hian Qarabag chuan Chelsea an mikhual ve thung ang.

Nilaini champions League
Legue Stage result

Athletic Club 3-1 Qarabag
Galatasaray 3-1 Bodo / Glimt
Atalanta 0-0 Slavia Prague
Bayern Munich 4-0 Club Brugge
Chelsea 5-1 Ajax
Eintracht Frankfurt 1-5 Liverpool
Monaco 0-0 Tottenham Hotspur
Real Madrid 1-0 Juventus
Sporting CP 2-1 Marseille