ADVISORY COMMITTEE ON A.R LAND-HI AN RINTLAK MEUH ANG EM?

Mizoram khawpui chhung laili taka Assam Rifles inbun nghet tlut thin kha kan ngaimawhna chhan ber nia lang chu kum 1988 lai vela AR sipai zurui khawlai leng leh kan police lamte inhmuh thiam lohna avanga buaina chhuakah khan AR lamin chengrang kauva Mizo thalai nunna an lak vang kha a ni ber a. Mipui min venghimtu tur ber nia ngaihte’n rawlrala chetna ang maia mipui min diriam avang khan Mizo mipuite’n hnawk kan ti chho ta hle a ni. Khatih laia CM Pu Laldenga phei kha chuan “AR-ho hi hel an ni a; Aizawl khawpui atangin lak chhuah vat ni rawh se” tiin Ministry of Home, Central Govt.-ah a thlen a. Khata chin Zokhawsanga an insawn thleng khan AR sawn chhuah chungchang hian buaipui a hlawh chho reng a, tunah vanneih thlak takin a lo hlawhtling ta a ni. Hetia an chhuah takah chuan an hmunhma hluite hi mipui kutah awmin mipui tana hman tangkai tum mek a lo ni chho ta hi a laawmawm takzet a ni. Hetih lai hian an chhuahsan thlenga mimal LSC nei, la surrender ve lote kha engtin nge sawrkar hian a tihzui tak zel tih hi dawn tiseitu a la ni fan.
Tichuan, October 16, 2025 khan Chief Minister hovin Assam Rifles chhuahsan ram hman dan tur ngaihtuahin an thukhawm a. Master Plan siam that an thlir ho leh ruahmanna thar ber anga ram zau zawng zaa 39.33 mipui mamawh hmunhma sakna tur niin a dang zawng zaa 60.67 chu Green Area tur anga ruahman niin a lang.
He Committee hian a rel tlangpuite chu hetiang hian tarlang ila:
n Aizawl Square, Ring road ni nghal siam;
n Chhuah lama bypass road, hmar lamah Saron atanga kal, Dak inpui bula chhuak sial,
n Mi 2000 lenna Convention Centre, a hnuai lam lirthei park-na lian tham tak nei sak,
n Kawngpui kam hmun hniha Mini Park siam,
n Two wheeler parking siam,
n Heritage Court siam te,
n Bypass road kiang Venghlui lam hnaiha Multi Level Car Parking leh
n Open Air Theatre sak,
n Khawpui laili chawmtu turin Baja tlanga Tui dahkhawlna sak,
n Chhuah lam bypass road kianga 33 KV Sub-Station dah,
n Tuna kawngpui awmsa tihzauh,
n Lungphun awmsate vawnhim,
n Canteen kuala War Memorial MINECO-a sawn,
n AR Hospital tlanga Police Out post dah,
Khatla-a Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram sorkar kuta awm tate hi inthlengpui dil a,, a hlawhtlin chuan Chief Minister’s Office leh Residence sawn phei nana hman,
Babu tlanga AR ram chhuahsan, neitu bik awm lova Green Park atana enkawl theih nan inkaihhruaina GAD lam duantirte a ni.
ACOARL thurel khi hetia han ngaih mai chuan a tha hlawmin a hlawhtlinna lang thuai thuai thei se a nghahlelhawm hle a, chutih rualin No. 3-na mi 2000 lek lenna convention Centre sak tur hi a beitham lutuk a, a aia lian mi 5000-10000 thleng len theihna tala ruahman ni se a tha lehzual ang. Tin, No. 7-na Open Air Theatre sak tur pawh hi lian thei ang ber leh changkang taka sak ni bawk se a tha ngawt ang. Bazar Bungkawn hnaih deuhah hian multi level car parking dawng hlawk tak awm thei bawk se. Dawrpui phei zawng zawnga lirthei dah thin hi sawn phei nan a tha ngawt ang. Tichuan, helai pheiah hian pick & drop nuamsa takin a tih theih ang a, han din zawk pawh a remchang deuh anga lirtheia Bazar tan pawh a awlsam phah ngei ang.
Hei bakah hian Dawrpui atanga Bethlehem vengthlang kawng titlang se, traffic jam-te hi a ziaawm thei ngei ang. Saron veng atanga venghlui pan phei thei tur tan traffic jam a ziaawm viau bawk ang. Motor Parking hmun leh centre velte pawh a la sak belh theih nual tho vang. Khêlmual hrang hrangte pawh AR thlang lawk ah hian a la sak theih nual tih Assam rifles ram lo neih zau zia hi mi tam tak aiin a bula awm Bethlehem vengte hian an hre chiang hle. Loch house saw chu khawih danglam miah lo se, uluk takin a nihna ang angin enkawl chhunzawm ni se a tha berin a rinawm.
Mizo mipuite leh khualzinho tlawh theih tur khawpin park nuam tawk man chawia luh theih turin siam sela, lammual a awm sa bawk nen, smart parking felfai tak awm bawk se la, mizoram sawrkar tan chuan sum lakluhna tha tak a ni bawk ang. Tin, Nehru stadium nuam leh changkang tak ang maite khu siam thei phei se’ng chuan duhthusam a va nileh zual dawn êm! Hei bak pawh sawi tur tam tak a la awm thei awm e.
A tawp berah chuan ruahmansa bak ram ruak dang zawng zaa 60.67 Green Area tur anga ruahman hi hun a rei ang a, a rukin mimal inhmun atan an hlep ralleh thak mai ang tih ber hi venthawnawm ta chu a ni. AR-in an luah lai reng pawha khati zozai mimal LSC lo awm thei maite kha dawnkir changin lung a phang lawk takzet. GAD lamin kaihhruaina (guidelines) duang fel viau pawh ni se, mipui thlima a ruka rule of law palzut chingte chu rorellai party zel, leh Milian (bureaucrat)-te zel an nih si chuan ngaih tha taka awm a har ta hle mai! Chuvangin, AR chhuahsan ram ruak zau zawk 60.67 Green area tur anga ruahman hi dik lo taka a ruka hleh ral a nih vaih chuan AR an insawn chhuak hi pawi kan la ti vawng vawng ang a, inchhirin ban bak a chen dawn si lo. Chuvangin, Zoram mipui, all NGO leh eptu party leh kohhranhote hian tangrualin uluk takin rorellai party-te hi ar nghal vena kan ven tlan a ngai dawn ta niin a lang.