2026 MusiCared Person of the Year – Mariah Carey

2026 MusiCared Person of the Year – Mariah Carey
Mariah Carey chu 2026 MusiCares Person of the Year chawimawina dawng tura tlan a ni a, he event hi 68th annual Grammy Awards an sem hma ni hnih, January ni 30, 2026 khian Los Angeles Convention Center-ah neih a ni ang.
Carey hi 2004-a Sting-a’n he chawimawina a dawn hnua he chawimawina dawng thei naupang ber a ni dawn a, hmeichhe lamah chuan 1994-a kum 36 mi ni a award dawngtu Gloria Estefan tih lohah a naupang ber a ni bawk ang.
Recording Academy & MUsiCares CEO Harvey Mason jr. chuan, “Kumin MusiCares Person of the Year chawimawina Mariah Carey kan hlan thei tur hi kan tan pawh a hlu hle a ni a, ani anga talent nei tha hi an piang zen zen lo. A themthiamna leh a aw tha tak te hian kan hun laia rimawi ropui a siam a. He zan special takah hian a career-a a hlawhtlinna te lawmpui hlan kan nghakhlel tawh takzet a ni,” a ti.
Nakum hi MusiCares benefit gala an neih vawi 35-na tur a ni tawh dawn (2021 khan COVID-19 hripui leng avanga event an thulh tih loh chu kumtin an nei ziah) a, he gala hi MusiCares program tana sum tuakna niin, dollar maktaduai tel an tuak thei thin a, an program-ah hian music lama eizawng te tana health & wellness service, addiction recovery, preventive care, disaster relief leh emergency support thlengin a awm a ni.
Person of the Year an hlan hmasak ber chu David Crosby niin, 1991 khan an hlan a, chu chu 33rd annual Grammy Awards ceremony an neih hma ni hnihah a ni a, he Grammy-ah hian Mariah Carey pawhin a Grammy dawn hmasak pahnih- best new artist leh best pop vocal performance (female) te chu a hla hit ‘Vision of Love’ avangin a dawng nghe nghe a ni.
MusiCares chawimawina dawng te hi rimawi khawvela mi namai lo tak hlir an la ni a, tun kum nga chhunga dawngte pawh hi an theuneu lo hlawm khawp a, Aerosmith, Jonu Mitchell, Berry Gordy leh Smikey Robinson, Jon Bon Jovi leh Grateful Dead te an ni.
Mariah Carey hi midangte tana luanchhuah kawngah a inui lo viau mai a, Hurricane Katrina leh COVID-19 hripui len lai te pawh khan a luangchhuak nasa viau a, Fresh Air Fund nen thawk dunin Camp Mariah a din a, hriselna, zirna leh vantlang nun lama hmasawnna tura thawktu hriathlawh tak an ni.
Carey hian tunhnaiah pawh chawimawina chi hrang hrang a dawng nual a, 2022 khan Songwriters Hall of Fame-ah lak luh niin, February 2024-ah The Recording Academy Black Music Collective-in Global Impact Award an hlan a, September thla khan MTV Video Music Awards-ah Michael Jackson Video Vanguard Award a dawng a, he award show-ah a hla Type Dangerous avangin best R&B a dawng bawk. Carey hi tun kum hnih chhungin Rock & Roll Hall of Fame-ah nominee a ni tawh a, mahse, a hun a la inherchhuak lo deuh thung.
Chart lamah pawh a duai lo khawp mai a, Billboard Hot 100 (US singles) chart-a No.1 kai thei hla 19 nei tawhin, a No.1 hit hmasa ber chu 1990-a Vision of Love kha niin, kumin January thla tir chart-ah pawh a hla ‘All I Want for Christmas Is You’ a la No.1 thei a nia. A ni aia solo artist Hot 100 chart No.1 kai thei hla ngah an awm lo va, group zingah pawh The Beatles chiah a pha lo. Heng a hla 19 No.1 kai thei zinga hla 18 chu a phuahtu zingah a tel vek bawk.
Billboard 200 (US albums) chart lamah pawh a duai lo hle a, 1991 khan a album ‘Mariah Carey’ chu No.1 kaiin, he chart-a a album No.1 kai thei hmasa ber a ni a, May 2008 a a album E=MC2 a No.1 thleng khan No.1 album paruk a nei tawh a, chart top 10-a lang thei album 19 a nei tawh bawk. A album thar ber ‘Here For It All’ chu tun thla laihawl chart-ah kan No.7-ah a la debut thei bawk a ni.
Mariah Carey hian Grammy Awards panga dawng tawhin, vocal performance bikah pop leh R&B-ah a dawng ve ve tawh a, Grammy Awards-a Big Four category an tih mai- album of the year, record of the year, song of the year leh best new artist-ah te nominate a lo ni tawh a, heng Big Four category-a nomination a lang vek thei pangana a ni bawk.
MusiCares event-ah hian cocktail reception, dinner leh tribute concert te telin, ticket man mi pakhat tan dollar 3,000 atanga 7,000 niin, dawhkawn pakhat, mi 12-in an kil theih chu dollar 30,000 atanga 80,000 man te a ni bawk.