US-in Russian tuialhthei company lian pahnih a hrek

US-in Russian tuialhthei company lian pahnih a hrek
US President Donald Trump-a chuan Russia-a tuialhthei company pahnih chu Moscow-in Ukraine a rûn kal zelah a hrek thar a, hei hian khawvel pumah a man chu Ningani khan 5%-a tihsan phah nghalin India pawhin Russian tuialhthei a lak luh thin a tihtlem zui ngei rin a ni.
Oil giant pahnih, Rosneft leh Lukoil hi khawvel puma tuialhthei thar chhuah 5% chuang thartu an ni a. Kar hmasa maiah khan Trump-a hian Russian President Vladimir Putin-a nen indo tihtawp tuma hma a lakna kal zelah Budapest-ah an inbe dawn tih a sawi hnu lawkah hetiang thil hi a kalpui thar leh ta thut a ni.
Trump-a hmalakna hian Russia sum dinhmun a nghawng ngei rin a ni a, hei hi US-in remna siam tura Kremlin a nawrna a ni bawk.
Putin-a chuan US chet dan chu thian tha chunga tih tur a nih loh thu a sawi a, Russian economy pawhin a tawrh loh tur thu leh an ram chu khawvelin a mamawh hle zawk tih a sawi a. Nasa taka thawn chhuah an tihtlem chuan a man a tisang dawn a, US ngei tan pawh a tha dawn lo tih a sawi.
Ukraine chuan US leh European an thawhpuite chu hmun hla kap phak missile pe turin a nawr mek zel bawk a, Putin-a pawhin an ram laili zawk kah a nih chuan thil tha lo tak a nih dawn thu a sawi bawk.
US-in a hrek avang hian Chinese sorkara tuialhthei la luttute chuan Russian tuialhthei an lei chu a nghawng nghal niin sawi a ni a. A leisaktu tam ber, India-a a thlifimtute pawhin lei tlem nghal an tum niin an sawi bawk.
Russia dawrtu lian ber ber pahnihin an leisak tlem chuan Moscow-in tuialhthei atanga pawisa an hmuh a tlem dawn a, khawvela lei tam ber ramte hian hmun dang atanga leina an zawn a ngai dawn bawk.
Trump-a hian Nilaini khan Putin-a nena an inkawm tur a sawi tawh chu a thulh a, hmaichhana an inkawm chuan a duh ang thil tha a chhuah dawn chuang lo niin a sawi a ni.
Putin-a chuan Trump-a hian an inhmuh hun tur a sawn niin a sawi ve thung.
Moscow tana sum hnar tihtawpna dangah EU chuan an hrekna 19-na an kalpui tan bawk a, hei hian Russian liquefied natural gas (LNG) an lak luh thin tihtawpna a tel.
EU hian Russia an rinchhanna hi kum 2022-a indona atang khan 90% velin a tihniam tawh a, kumin thla hmasa lam thla riatah khan Euro tluklehdingawn 11 man an la lut a, LNG hi EU-in Russian energy a leisak tam ber a ni.
US leh Qatar-in an nawrna avangin EU hian leisak tlem turin thutlukna an siam a ni.
EU hian Chinese company lian pathum chu Russian an hreknaah hian an teltir a, hengte hi Russian tuialhthei thlitfim loh lei tam niin Beijing chuan chhan let a tum bawk.
Russia hian tuialhthei leh boruakalhthei a hralhna atanga sum a lak luh hi kum khatah 21% velin a hniam tawh a, energy an hralhna hi Ukraine an beih meka an sum hnar ber a ni.