Kawngpui chhia hi….

Mizorama kawngpui chhiat hma chhan bulpui ber hi, siam a nih laiin, ‘kawngpui siam dan tur ang thlapa siam a nih thin loh vang’ tiin sawi ta ila, a dik deuh ber awm e; mawhpuh tur dang a awm vak lo ang.
Kawngpui enkawltu lam chuan chhuanlam an nei ve tho. ‘Mizoram lung a chang tha lo’, ‘ke 12 nei lirtheiin an phur rit thei si a, an rap chhe zung zung,’ ‘road maintenace fund kan dawng tha lo..’ etc etc… tih vel te pawh a ni mahna. Mizoram lung hmang theuh theuh, kawngpui siam a intlo hleih viau zel tho, chhuanlam atana ‘lung chang tha lo’ hman hi a dik vek lo.
Ruahtui te pawh chhuanlama hman reng tur a ni lo. State dangah pawh ruah a sur tluk tluk a, kawngpui tha tak tak an nei thei tho.
Kawngpui a chhiat luat avanga lirthei tlan duh lo chu thuhran, total bandh huaihawt khum a han ni mauh mai te hi a lungchhiatthlak; thinrim tawngkhawng tihngaihna hre lo hmalakna chu a ni deuh ber awm e.
October ni 30 atangin kawngpui siam beihpui thlak tur tih te kha sawi rik a ni tawh a, kawngpui siam a nih laiin a kaihhnawih mawhphurtu department lamin uluk takin hnathawktute vil (monitor) se, fur khat daih lek tura siam lo turin.
A nihna takah chuan, Mizoram kawngpuite enkawl tura kawngpui siam lama thiamna sang tak nei, engineer rualte tan chuan kawngpui dung hi an feh chhuahna tur a ni a. Kawngpui dinhmun hriat nan road inventory survey/road condition survey te neiin assessment te hi an kalpui reng tur niawm tak a ni.
Tuna a lan danah hi chuan, kawngpui a chhiat tawpkhawk hnuah, lirtheite pawh kawngpui dunga an tluk tawp tawp hnuah, minister rual nen kawngpui chhiatna lai hi an en ve tawk ni mai te hian a hriat a. Kawngpui chhia enkawl tura kawngpui chhiatna hmun riahchilha Legislator rual thawhchhuah ngai khawpa kawng chhiatna hi state dangah hian awm ve tak maw!
Mizoram kawngpui chhiat dan history-ah hian, eng sawrkar ber emaw mawhpuh ngawt chi a ni lo; kawngpui chhia hi chu ‘sawrkar zawng zawng intawm’ a ni ber. Sawrkar thar pawh hian, election campaign laia ‘kawngpui tha kan pe ang che u’ an tih kha an tihlawhtling bik lova, a huna siam that ngai lai an siam that bik loh avangin, ‘sawrkar zawng zawng’-ah hian an rawn tel ve nghal.
A ram leilung fate hian, pawn lam atanga Mizoram hmasawnna hna rawn thawkte hi kawh berah i nei lovang u; an thawk dik lo emaw, an thawk tha lo emaw a nih pawhin, ‘kan awm ve reng laiin chhe deuhvin/dik lo deuhvin an thawk thei a, kan inenfiah a ngai a nih hi’ tia mawhphurhna (accountability) inpe ngam zawk turin i intuai thar zawk ang u.