Falkawn Zokhuaah live museum bul tan

Falkawn Zokhuaah live museum bul tan
Art & Culture Department buatsaih Live Museum chu Inrinni khan Zokhua Falkawnah neih a ni a. Art & Culture minister C Lalsawivunga’n kawtchhuaha Sekawtrawlhah kawi hrui sat chatin a hawng.
Live Museum buatsaih a ni chu thangtharten pipute khawsak dan leh nunphung an hriat tharna atan, tualchhung mite leh thalaite tana sum lakluhna hnar atan, zinmiten Mizo kutchhuak an hmuha an lei theihnan leh Mizo nihna leh hnam zia an zir theihnan a pawimawh tih minister hian a sawi a. Ei leh in pawh Mizo taka buatsaih a nih a, Live Museum chu tihchangtlun a nih chhoh zel a beisei tih a sawi a ni.
Live Museum hawnnaah hian EF&CC principal secretary Sudhir Kumar, inspector general of Police Seju P Kuruvilla leh principal chief conservator of Forests Rajeev Kumar Tiwari pawh an tel a. Falkawn khuaa tlawmngai pawl – YMA, MHIP, MUP atanga thlan chhuah leh Lenkawl Cultural Club-in hmanlai Mizo khaw nun dan an entir a ni.
Live Museum show hi a bultanna atan kartin Inrinni apianga neih tum a ni a. Art & Culture department chuan heng ni – October 25, November 1, 8 leh 15-ah hian Live Museum buatsaih tumin, a tul dan azira buatsaih chhunzawm zel tum a ni. Mizoram state pawn atanga khualzin lo lut an pun belh zel avangte, tualchhung mipui (local) tourism-a kan harh thar zel avangtein chu’ng mite en tur leh chhim theih tur chuan Mizo nunphung leh hnam zia chawilarna atana buatsaih a ni.
Thangthar leh naupang zawkten Mizo nun zemawi leh chin dan hrang hrang a taka an hmuh leh tem chhin theihnan, zirlaite tana tangkai tur leh an zirlaibua awm an hriatthiam lehzual theihnan leh khualzinten Mizo hnam nun an hmuhfiah theihna tura buatsaih Live Museum hi Inrinni apiangin a luh man Rs. 100 chawiin a chhim theih dawn a; show hi hun hniha then niin, hun khatna chhun dar 12.00 atanga chawhnu dar 1.30 ah neih a ni anga, hun hnihna chu chawhnu dar 2.00 – 3.30 ikarah neih a ni ang.