November 15 atangin Territorial Army atan intlar tan theih dawn
Mizoram-in Territorial Army a neih turah kumin November 15-25 chhung hian lak a ni dawn a. A vaiin mi 170 vel lak an ni phawt dawn. State Level Committee on Territorial Army Coordination and Establishment chairman Lt.Col. Clement Lalhmingthanga, MLA sawi danin, a tirah sawrkar laipuiin Mizo Territorial Army lak turah mi 70 la phawt turin a rawn ti a. A pawimawhna hria in general duty atan mi 144 bakah tradesmen leh clerk nen phei chuan mi 170 vel lak a rawn phalsak a, hmeichhia 9 tan hauh bik nghal a awm bawk tih a sawi.
Territorial Army (TA) hian an awmna state milin hna hrang hrang an thawk a, Mizoram-a din tur hi TA (Home & Hearth) tih niin, intelligence lam hna bakah ramri ven leh indonaah army/ infantry-te hnung dawl a, chhiatrupna thil thleng ang chi ah pawh che chhuak thei tura duan an ni tih a sawi.
TA chu sipai anga kum rei tak chhung a ngheta lut tur ang an ni loa, tunah hian kum 7 chhung thawk tura lak phawt tur an ni dawn tih Committee chairman hian a sawi. Chutihrualin, Agniveer-a lut, kum 4 hnua chhuahtir leh takte tan pawh luh theihna kawng a inhawng zau anga, kum 7 an tan chhung hian, tuna 8th Central Pay Commission hmang tura buatsaih mek an nihna nen, mahni ram chhung bak pel lo turin hlawh engemawzat an la hman dawn tih a sawi a ni.
TA officer-a tang duh tan phei chuan kum khatah thla hnih bak service a ngai loa, a bak zawngah hian mahni duhzawng leh eizawnna dang tih theih a ni tih a sawi a. Politics thlengin a khelh theih tih a sawi. Chutihlaiin sipai pangngai tan erawh thla 9 tal service a ngai dawn a. Kum 18-42 inkar, pawl 10 pass chin tan tih sawi a ni.
Mizo TA la tur hian 166 INF Bn (TA) (H&H) Assam chu Aizawlah an rawn inbun tawh a. Thudawn danin, rawn inbun zingah hian Mizo, Assam Regiment-a tang lai thenkhat JCO leh sipai pangngai ‘attach’ in an rawn kal a ni.
Mizo Territorial Army hi battalion angin a la ding nghal dawn loa, 166 INF Bn (TA) hnuaiah hian a awm ang. An awmna tur hi Aizawl, Lunglei, Champhai leh hmun dangah enkual mek a ni.