Mizo Idol Top 10 atanga hmeichhe 3 tlak zanah intihsiaka zai sual |hakima social media kaltlangin Top 7-ah tling

Mizo Idol Top 10 atanga hmeichhe 3 tlak zanah intihsiaka zai sual |hakima social media kaltlangin Top 7-ah tling
LESDE Mizo Idol 2025 Season 8 top 10 intihsiakna result chu Inrinni zan khan an puang ta a, hmeichhe pathum tlain, top 7 a tling te an intihsiak nghal a, an chetha hlawm viau a, Thawhlehni zanah Top 5 tlingte puan a ni ang a, top 5 finalist te chu October ni 28 leh ni 30 zanah an intihsiak leh ang, ni 30 zan atang hian house band nen an intihsiak tan tawh dawn a ni. Mizo Idol live show hi a hmunah chhim theih a ni a, ticket Rs 100 leh Rs 150 man awmin, a hmunah zawrh chhuah nghal a ni.
Top 10 intihsiaknaa Zonet social media pathum- YouTube, Facebook leh Instagram a contestant te zai video clip entu ngah ber chu Top 7-a tling nghal tur a ni a, Top 10 inthsiak zanah zaitha tak, mahse, hlathu a theihnghilh avanga chesual palh zauh Mamit tlangval Lalthakima chuan heng Zonet social media pathum a views a neih belhkhawm chu nuai 11 chuang niin, views a ngah ber a, top 10 intihsiakah chesual mah se tuma sawi buai theih lohin Top 7-ah a tling a, Top 7 a tling zingah puan hmasak ber a ni bawk.
Chet fuh loh tum a nei thei lo ang an tihhial khawpa zaitha thin, Tuikual South tlangval Emmanuel Lalremruata chu Top 7-a tling an puan pahnihna niin, Laldinsanga Ralte, Upper Republic, Vanlelneihpuii, Chamring, Sylvia Malsawmpuii, Champhai Venglai te pawh back stage lama lut thei tur zingah puan an ni ve leh a.
Stage-ah mi panga an la awm a, top 10 intihsiaka judge ten an zai an comment dan thenkhat te host-in sawi chhuakin, thin phu dep dep a an awm hnu Zomuansanga, Dawrpui Vengthar leh Remlalvuani, Thenzawl te pawh back stage lama lut thei an nih thu puangin, hmeichhe pathum- Maria Lalriatzuali, Chhinga Veng, Eunice Rosangpuii, Kolasib Venglai leh Lawmsangzuali, Shillong te Top 7-ah an inhlangkai zo ta lo a ni.
Top 7-a inhlangkai zo ta lo te hian hla hnuhnung an nei leh theuh a, a zai hmasa ber Maria chu hnuk ulh avanga a perform that loh karah mipuiin a zai an chhunzawm sak bakah stage-ah contestant dangten an tawiawm ve nghal a, a boruak a danglam khawp mai.
Top 7 tlingte an intihsiak zui nghal a, an zai tha tlangpui a, chutihrualin Zomuansanga a chesual palh tlat mai- hla thu a theihnghilh. Top 7 chinah chuan chetsual zeuh a pawi tawh dawn si a, Zomuansanga tan Mizo Idol intihsiakna a tawp mai tih a hlauhthawnawm ta riau.
Social media kaltlanga Top 7-a invawrh kai, Lalthakima mipuiin an thlang sual lo. A chetsual tawh avanga kimki chuang miah lovin, stage performance hmuhnawm tak nen a rawn comeback a, a zaithiam mai piah lamah entertainer tha tak a nih zia a rawn pholang a, social media views avanga Top 7 tling kha, Top 5-ah pawh kan hmuh zui zel a rinawm tlat!