Crop insurance kan kalpui dawn – Farmers’ Welfare minister

On Oct 28, 2025 2 0

Crop insurance kan kalpui dawn
– Farmers’ Welfare minister
Loneitute hmakhua ngaiin Mizoram sawrkar chuan crop insurance a kalpui dawn a, a buaipuitu tur pawh thlan fel a ni tawh tih Agriculture & Farmers’ Welfare minister PC Vanlalruata chuan a sawi.
Thawhtannia ZPM party office-a inkhawmah minister PC Vanlalruata chuan, chief minister Pu Lalduhoma’n hman atang tawhin kuthnathawktute hmakhua a ngaiin a vei em em a, a tlangau hla ber pawh budget-a thlai thar leina dah leh crop insurance kalpui a ni tih a sawi.
“State Level Coordination Committee on Crop Insurance kan din tawh a, tender kan chhuah a, TATA AIG General Insurance Company Ltd. kan thlang fel tawh. Mizoramah crop insurance kan kalpui thei dawn ta a ni,” a ti.
Kuminah sawhthing rate chhiat avangin kg ah Rs 50-a hralh an huphurhawm hle naa, an auhla a nih avangin chief minister hoin tihhlawhtlin ngei tha an ti a, kuthnathawktuten an thawhrim rah an seng mek tih Farmers’ Welfare minister hian a sawi.
Sawhthing lei leh hralh chungchangah thil felhlel a awm tih hriain sawrkar chuan a chhuichiang mek a, pawn lamah pawh mi thahnemngaiten tih takzetin an lo veipui chu a lawmawm hle tih a sawi bawk.
Tunhnai khan central atangin lehkha a dawng a, Mamit district chu PMDDKY (Pradhan Mantri Dhan-Dhaanya Krishi Yojana) hnuaiah Aspirational District-ah dah a nih tur thu an rawn hrilh tih a sawi a. Dampa bial mipui an vannei dawn hle a, Mamit district chu potential nei tha, district vannei tak a ni dawn tih a sawi a ni.