FCAA hnukkir tura phutna total bandh zawm a hlawh
Forest (Conservation) Amendment Act 2023 an duh lohna leh hnukkir tura Mizoram sawrkar phuta Mizo National Front-in Nilainia total bandh an huaihawt chuan zawm a hlawh tha a, zawm a hlawh that avanga an hun tiam sa aia an titawp hma lutuk erawh lungawi lo an awm nawk nia sawi a ni.
MNF party-in Mizoram pum huap total bandh an neih hi zing dar 6.00 a tan a ni a, Aizawl leh khawpui lian deuh hoah chuan zawm a hlawh tha hle tih thu dawn a ni. Thihna avang leh damlohna avanga veivak ngai an awm tih loh chu duty lamin lirthei an lo ti ding a; heng zingah hnamdang khalh lirthei, bungrua daha Mizorama lo lut a tam ber tih duty-te chuan an sawi.
Khawi hmunah mah bandh duty-te ngenna zawm duh loh avanga innek leh buaina a awm thawm hriat a ni loa, boruak tha tak hnuaiah bandh hi neih a ni.
Hetihlai hian MNF Action Committee chuan mipuiin an zawm tha hle nia an hriat avangin tlai dar 4.00 thlenga neih tura an puan lawk chu, chawhnu dar 1.00 khan tihtawp an rel a. MNF treasurer Lalruatkima chuan, total bandh thlawptu mipui chungah lawmthu a sawi a. Mizoram sawrkar pawhin a hnuaia thawkte kal tura a ti lui lo chu, bandh an thlawpnaah an ngai tih sawiin sawrkar chungah an lawm tih a sawi bawk.
Am bandh neih chhan thlawptu NGO leh political party chungah pawh lawmthu sawiin, bandh-in a tihbuai nitina eizawnna hrang hrang thawktute, ram chhung leh pawna zin veivak laklawh leh sumdawnna dawr hrang hrang khar tura an ngenna ngaihpawimawh sak an nite, zirna in-in an zirlaite kal tura tih luihna awm loa an zirna in an khar pawh lawmawm an tih thu a sawi a ni.
FCAA chu Mizoram leh Mizote tan a him loa, he dan hi zawm a nih lohna turin an beih chhunzawm zel dawn a, MNF a sawrkar hunah chuan he dan pawm tawh hi an ennawn dawn tih Lalruatkima hian a sawi bawk.
Hetihlai hian Mamit district-ah total bandh hi neih a ni ve loa, Dampa bial by election neih turah election model code of conduct-in a phal loh vanga nei lui lo an ni tih MNF treasurer hian a sawi a ni.
The Aizawl Post thudawn danin, total bandh-in zawm a hlawh that avanga an titawp hma leh lutuk chu MNF party chhungah pawh a lutuk mah mah deuh em, ti pawl an awm nawk a. Mimal leh sawrkar hnuaia thawk, an hotuten an hnathawhna hmuna kal tura an tih hnuhnawh leh ho pawhin an titawp hma mah mah deuh tih an sawi ve bawk.