Kuki hel, UKNA-in Churachandpur-ah khaw lal sawisa hlum

On Oct 30, 2025 6 0

Kuki hel, UKNA-in Churachandpur-ah khaw lal sawisa hlum
Manipur chhim lam, Churachandpur district-a khaw lal chu United Kuki National Army (UKNA) hel nia rinten an sawisa hlum nia sawi a ni.
Kum 50 mi, khaw lal hi M Haokip niin Thawhtanni khan kut an thlak niin district thuneituten thuthar lakhawmtute an hrilh a. Tual chhung miten Churachandpur-a damdawi in lian ber panpui nghal mah se kawngah a thi.
Lal taksaah kak leh sawisakna hnuhma a tam hle a. Tiang leh hmanraw bil tak hmanga vuak nia a lan thu tual chhung miten an sawi.
A chhungte leh police chuan engvanga UKNA hian bei nge a nih an sawi lo va, FIR ziah luh a ni tawh.
Haokip-a hi T Khonomphai khaw lal a ni a. Manipur-ah hian kum 1967 khan lal bânna dan pawm tawh mah se an thlahtute chin thin anga lal neih hi an la chhunzawm a, hman lai angin thuneihna tak tak erawh an nei tawh chuang lo.
UKNA hi Kuki, Zomi leh Hmar hel pawl 24-te telna pawl lian pahnih, September 4-a kum khat chhung daih tura sorkar laipui leh state sorkar nena suspension of operations (SoO) inremna ziak zingah an tel ve lo.
SoO inremnaah hian sipaiten hel pawl lakah beihpui an thlak lo va, helho hi an camp-ah awm vekin an ralthuamte chu a dahna hmun bikah kalh hnan tur a ni.
July thla khan UKNA hian Churachandpur-ah mi an lambunnaah Kuki National Army (KNA) deputy chief leh KNA hel pahnih an that a, an bul hnaia ding pakhat a thi tel bawk.
A hnua UKNA-in WhatsApp group-a thu an chhuahah Kuki hel hian an lambunnaa an hruaitu an thah avang leh KNA-in an pawl mi 30 chuang an thah phuba a nih thu an tar lang.
KNA leh UKNA inkar hi tun hnaiah a chhe hle tih tual chhung miten an sawi.
UKNA hian April, 2024 khan Assam-a Silchar nena an inkalpawhna, National Highway 37-ah fuel tanker an lambun niin an inchhal tawh bawk.
Tar lan tawh thin angin Manipur-ah hian May, 2023 atangin tlangrama cheng, Kuki leh phaizawla cheng, Meitei inkarah buaina chhuakin mi 260 vel thi an awm tawh a. Tharum thawhna zualpui chu reh tawh mah se buaina neuh neuh a la awm reng.