Meitei-ten tlanchhiate haw hma chhiarpui neih rih loh duh

Meitei-ten tlanchhiate haw hma chhiarpui neih rih loh duh
Khawvel pum huapa Manipur-a cheng Meitei hnam pawl hrang hrangte inzawm khawmna pawl lian chuan sorkar laipui leh an state sorkar hnenah buaina avanga an in leh lo tlanchhiatsan mekte an haw kim leh hma chu chhiarpui kalpui rih lo turin an ngen.
Meitei Alliance-in thuchhuah an siamah May, 2023 atanga chi leh chi inkara buaina chhuak avangin mi sang tam tak baihvai leh tlanchhiain an awm a, heti chunga chhiarpui kalpui a nih chuan an nihna dik tak hiat theih a ni dawn chuang lo niin an sawi.
Tharum thawhna hian ‘Manipur hmelhmang nasa takin a thlak’ nia sawiin tlanchhiate an haw hmaa chhiarpui neih a nih chuan an nihna dik lo takin a lan phah zawk dawn niin an sawi a ni.
“Meitei Alliance chuan Manipur-ah hian tlanchhiate an hawa him taka an awm leh hma loh chu chhiarpui hi kalpui loh ni se. Tlanchhiate haw hmasa se a duh,” an ti.
Meitei pawlin thuchhuah an siam hma lawk hian Manipur Chief Electoral Officer Arun Kumar Sinha hnenah an state-a draft electoral roll tihchhuah chu a rintlak tawk lo nia hriat thu thlen a lo ni tawh a. Bial tam tak, ‘tlangram’ tia chhinchhiaha bialah pawh rinhlelhawm a awm nia sawi a ni.
Manipur State Planning Authority-a member thin, Thoudam Jagat Singh-a’n August 4-a lehkha a thehlutah hian bial thuma electoral roll ennawn kalpuiah voter record leh data inmil tawk lo a awm niin a sawi.
Singh-a hian electoral roll tha chu ‘inthlan zalen leh dik’ awmna bulpui a nih thu ziakin, draft Special Intensive Revision (SIR) roll chu finfiahna awm tha tawk lova tihchhuah niin a sawi a ni.
Manipur-a Meitei-Kuki inkara buaina avang hian mi 50,000 chuangin an in leh lo an tlanchhiatsan a, mi 250 chuang thah an ni tawh.
Buaina a chhuah atanga kum thum hnuah national highway pawh hawn theihin a awm chauh a ni.