Raj Bhavan-ah Larsap hovin State & UT 6 din champha lawm

Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh hovin nimin khan Jammu and Kashmir, Ladakh, Andra Pradesh, Andaman and Nicobar Islands, Chandigarh leh Chhattisgarh-te dinchamphahak ‘Foundation Day’ lawmna chu Durbar Hall, Raj Bhavan, Aizawlah neih a ni. Larsap chuan India ram inpumkhatna atana Prime Minister hmalaknaa programme pawimawh tak ‘Ek Bharat Shreshtha Bharat’ hmangin India ram khawi hmunah pawh hnam ziarang leh nunphungte inpawh tlang taka pholanna ‘Mini India’ siam thin a nih thu a sawi a. Foundation Day lawm sak State leh Union Territory-te chanchin tlangpui tarlangin, Mizoram ang bawka hmun mawi leh ami chengte pawh mi tha tak tak an nih thu a sawi a. India ram anga hnam ziarang leh nunphung danglam nasa ram a awm chuan loh thu leh State/UT tinin hnam ziarang leh tih dan phung hran theuh an neih thu sawiin, India ram intodelh leh hmasawn ‘Vikshit Bharat’ siam turin lungrual taka kan thawhho tlan a tul a ni, a ti a. Kalkhawmte chu State dangte hnam ziarang, nunphung, tawng leh inkaihhruainate hriat chian lehzual tum turin a chah a ni.
He hun hi Lalhruaitluangi, APS to Governor chuan kaihruaiin programme buatsaih chhan a sawifiah a. Dr. K. Srinivasa Rao, Department of Geology, MZU leh Dr. Ashish Singh Patel, Department of Computer Science and Engineering, NIT Mizoram te’n Andra Pradesh leh Chhatisgarh State-te chanchin tawi an sawi a. Mizoram Christian College (MCC) zirlaite’n Mizo hnam lam mawi tak an entir a. Hemi hnu hian Governor leh Lady Governor te’n hemi puala kalkhawmte hi Upper Lawn, Raj Bhavan-ah kawmin hun hlimawm tak an hmang ho a ni.
Jammu and Kashmir leh Ladakh-te hi October ni 31, 2019 khan Union Territory-a puan an ni a. November ni 1, 1956 khan Andra Pradesh chu tawng behchhana state siam hmasak ber niin, hemi ni vek hian Andaman & Nicobar Islands chu Union Territory atan puan a ni a. November ni 1, 1966 khan Chandigarh chu Union Territory-ah siam niin, Chhatisgarh chu November ni 1, 2000 khan State-ah hlankai a ni.
Ek Bharat Shreshtha Bharat programme hian India rama State leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Raj Bhavan, Mizoramah Governor kaihhruaiin June, 2023 atang khan buatsaih tan a ni.