A rilru tina si lovin engtin nge i then theih ang?

A rilru tina si lovin engtin nge i then theih ang?
Ngaihzawng/kawppui te nena inthen hi thil awlsam tak a ni ngai lo. A tua te ve ve tan pawh inthen chuan nghawng eng emaw tak a nei thin a, lunglen leh khawhar chu thuhran a ni a, a thentu zawk nih loh phei chuan rilru na leh hrehawm tihna a nasa thin. Chuvangin kan ngaihzawng te kan then dawn a nih pawhin an rilru hliam lo thei ang bera kan chet thiam a pawimawh hle a ni.
Na miah lo a inthen chu thil harsa a ni ang a, mahse, na lutuk leh hrehawm ti tlawk tlawk a insiam kher lo va, kan thena rilru hliam vak lo a inthen theih dan tha ni a relationship lama mithiam te sawi kan rawn tarlang e.
1. Hmaichhanah ngei inthen kan duh tih inhrilh tur a ni. Kha leh chen in lo inzui ve tawh chuvangin engmah sawi lo va reh san ringawt emaw, phone call leh SMS tih vela inthen thu inhrilh emaw te hi tih loh tur a ni. Hmaichhanah ngei tawngkain inhrilh tur a ni a, chu chu a phu ve a ni.
2. A hun thlan thiam a pawimawh. Ngaihzawng te kan then dawn a nih chuan kan then duh chhan te hriat ngei a duh dawn a, chipchiar takin min zawt ngei ang. Chuvangin hmanhmawh leh hnawhsarum taka inhrilh liam puat lo a, engkim fiah fai taka inhrilh a, titi thei tura hun thawl leh, hmun fal neih hun nghah thiam tur a ni.
3. I sawi tur ngaihtuah lawk ang che. I sawi dan tur leh a zawhna chhan dan tur te inbuatsaih lawk la, inthen i duh chhan tha tawk sawi tur neih ngei tum ang che. Inthen i duh tih sawi chhuah phawng chu a harsa ve dawn a, mahse, pehhel kual reng loin, sawi tlang thuai tur a ni. hei bakah hian kan duh dan chu chiang taka a hriat theih ngei nan sawi tur a ni a, engtin emaw ngaihtuah chawp deuh hnuah hriatthiam tur ang chi a sawi loh tur a ni.
4. A rilru tur ngaihtuah thiam ve a pawimawh a nia. Inthen chu a hma daih atanga i lo duh tawh pawh a ni mai thei a, mahse, anin chu chu a hre ve kher lo tih hriat tel tur. }awngkam na leh bung lutuk a inthenna thu sawi loh tur a ni a, a rilru tihnat belhchhan tur zawnga mei nei tak leh huatthlala zawnga sawi loh tur a ni.
5. Inthen chhanah in mawhpuh loh tur a ni. Hei hi hriatreng a pawimawh khawp mai, in pahnihin hun khirh in tawng a, inthen chu thil awlsam a ni dawn lo. Hetiang hunah hian inthen chhanah a tu emaw zawk inmawhpuh hi thil awlsam tak a ni. Mahse, hei hi pumpelh tum tur a ni, a dik zawk leh thiam zawk nih tumna hian boruak a tichhe mai mai thin.
6. Ani nen chuan eng emaw chen in lo inhmangaih tawh a, in lo inzui ve tawh avangin zahawm taka inthen hi a phu a ni. Chuvangin inthen dawn tih vanga rilru intihnat sak chiam tum kher tur a ni lo va, chhe taka inchhuah pawh a ngai chuang lo. Inthen chu a nat tawh naklaiin, a natna belhchhan tura tawngkam neih ai chuan a thawidam zawnga aw ka neih tum hram hram tur a ni.