CM insawifiahna ECI in pawm lo CM lakah complaint thehlut thar

Dampa bial by election campaign-a a thusawi avanga complaint lut bawhzuinaah chief minister Lalduhoma insawifiahna chu Election Commission-in fiah tawk loa ngaiin insawifiah nawn turin a ti. Hetih lai hian MNF Legal Board chuan chief minister hi a thusawi avang bawkin complaint an thehlut thar.
ZPM leader Lalduhoma hian October 20-a Reiek khuaa ZPM party tana by election campaign khuhhawnnaah leh October 21-a New West Phaileng-a campaign khuhhawnnaah sawrkarin hmasawnna hna a thawhsak tur a sawi chhuah danah MNF Legal Board-in joint chief electoral officer hnenah complaint an thehlut a ni.
MNF Legal Board sawi danin, CEO office hian Election Commission of India hnenah complaint hi an hlanchhawng a, ECI hian chief minister hi insawifiah tura tiin, show cause notice an pe. Chief minister aiawh hian ZPM party chuan insawifiahna an thehlut a, ECI hian fiah tawk loa ngaiin sawifiahna thawn tha turin a ti a ni.
CM ruala an complaint tel, adviser to CM Dr Lorrain Lalpekzuala Chinzah chu ECI hian ‘warning’ an pe tih sawi a ni bawk.
MNF Legal Board hian November 6 khan CEO office-ah chief minister Lalduhoma lakah tho hian complaint an thehlut thar leh a. Chi leh chi inkara inhuatna siam thei tawngkam a hman bakah sawrkarin a tih sak tur a sawi tih an sawi.
Representation of Peoples Act 1951 leh model code of conduct hrereng chung a, Dampa bial by election neih tura a awmna party chakpui a duh luat vanga hnam tlem zawk, Chakma hnena a chipui Mizote leh ram hruaitu hmasate a chhe thei ang berin a hek duh tih MNF Legal Board member Saihmingliana Sailo chuan a sawi.
“RP Act hnuaiah ‘Party tumahin hnam leh hnam emaw chi leh chi emaw sakhuana emaw inkara inhuatna emaw innghirnghona lam kaihhnawih engmah hmalakna lam hawi an ti emaw an sawi tur a ni lo’ tih a bawhchhia a. Mizorama cheng, chi leh chi inkara inhuatna chawh thawh tum zawnga chief minister thusawi hi RP Act 1951 Section 123 (3-A) in ‘corrupt practices’ tia tarlan, Section 125 anga – ‘kum 3 thleng lung in tan leh sumfai chawia hrem theih’ a ni,” a ti. Hetianga dan pawisa lo chu chief minister ni zel tlakah an ngai lo tih a sawi.
Hemi ni vek hian chief minister hian mipui chu an party candidate an vote loh chuan sawrkar atanga hamthatna an hmuh turah hreka a vau bakah hamthatna chi hrang hrang a tiam niin MNF Legal Board hian an sawi bawk.
“Silsury kawng siamna tur cheng vaibelchhe 100.40 dah fel a nih tawh thu leh kawng tha siamsak an nih tur thu, kawngpui, border trade, CM’s Special Package, mirethei in sak tanpuina leh an mamawh dang pek an ni dawn tiin a sawi a. Heng a thusawi hian Election Commission of India duan model code of conduct para VII 6(a) & (c) a kalh a ni,” Saihmingliana Sailo hian a sawi.
MCC tarlan danin, ‘Sawrkarna chelh mektu central emaw state emaw in an official thuneihna hmansual phal a ni loa, inthlan ni tur Commission-in a puan tawh hnu ah, minister emaw official (thuneituten) tumahin tanpuina sum leh pai puanchhuah leh heng kaihhnawih intiamna hi an siam tur a ni lo. Kawng siam tur, tui in tur pek leh a dangte engmah an tiam tur a ni lo,’ tih chu a kalh tih a sawi.
“Chief minister berin dan chunga leng nia inngaia dan pawisakna chhete mah nei loa a chetvel avang hian CEO hnenah hma la turin complaint kan thehlut a ni,” a ti.