Ni 51 chhung hri vei thar awm tawh lo

Kuminah Covid-19 a rawn inlan leh a, mahse a nasa lo. A nasat loh bakah tun hnaiah phei chuan hri vei hriat chhuah thar pawh an awm lo a, ni 51 chhung chu hri vei thar an awm tawh lo.
Integrated Disease Surveillance Programme (IDSP) chhinchhiah danin, September ni 16-ah hri vei thar pakhat a awm a, chumi hnuah November ni 6 thlengin hri vei hriat chhuah an awm tawh lo.
Hriat chhuah hnuhnun ber, September ni 16-a mi hi September ni 22-ah a chhuak a, chumi hnuah chuan Mizoramah hri vei an awm tawh lo.
Doctor-te chuan tun hnaiah hri vei hriat chhuah an awm lo hi thil lawmawm a nih thu leh, a reh telh telh tihna a nih theih thu te an sawi a, mahse he hri hi Mizoramah a awm tawh avangin, a reh tia sawi tur a nih loh thu te, Covid-19 vei hriat chhuah hi khawvelah an awm zeuh zeuh tura ngaih a nih thu te an sawi.
Kum laihawlah khan India ram hmun thenkhatah he hri hi a darh leh a, India sorkar pawhin a do dan tur te a duang tha leh. Mizoramah pawh May-ah hriat chhuah a ni leh, hri vei tam ber thla August-ah chuan 20 an tling. September-ah pakhatin a vei a, hriat thar an awm zui rih lo.
IDSP chhinchhiah danin, kuminah Mizoramah mi 40-in hri an vei tawh a, an zinga 24 chu mipa an ni. A tam ber chu Aizawl district mi an ni a, kumina hri vei hriat tharah hian vanneihthlak takin na tak an awm lo. Natna dang vanga inenkawl, fimkhur thua endik an ni tlangpui a, an chhungte’n an vei avanga endika an lo vei ve tih hriat chhuah pahnih khat an awm tih thu dawn a ni.
Sample endik hi chu a awm ve deuh reng a, endik ngai pawh hi a tlem telh telh tih thu dawn a ni.